Chasqu’an per Nové, lo monde de Dinha dei Banhs son acostumats de se retrobar per una velhaa ambé les escolans de provençau. Aquest’an, aquò se faguèt lo 13 de decembre e era estaa conviaa per assaborar la festa, la contaira camarguenca Lisa Gros.
Mai de 100 personas se rechamperan per entendre sei pichòts juar e chantar en provençau ambé  lors animatriças Ania Martel e Mi-Jò Allard.

Au programa :

• Dos contes juats per les enfants de l’escòla Paul Martin : "La chabra que volia pas passar lo pònt" e "Ou jà !"
  
• Chanson « La civaia»
  
• Les juòcs de la  recreacion (Migodon migodaia, Peis e pescaire…) per les enfants de l’escòla de Beausoleil
• Chanson « Un elefant »
  

Puèi, Lisa Gròs nos menèt caminar entre Camarga e Provença, sus de chamins estelats, entre magia e tradicion , ambé de personatges bèus per sei Còntes de Nové e dau freg.
La seraa s’acabèt a l’entorn d’una taula clafia de saussons, desserts e autras bònas chausas cosinaas per les parents.

Aquèu rescontre es chasque viatge, un moment de convivialitat e d’eschangis entre monde de totas generacions, onte la lenga juga un  ròtle dei mai importants. Aquò fuguèt organisat per lo Contrat Educatiu Locau de la Vila de Dinha dei Banhs que prepausa dempuei 7 ans ais escolans de la vila, ambé l’ajua dau Consèu generau 04, una activitat setmaniera « Lenga e cultura occitanas ».

Ania Martel.