Que s’es passat aquesta setmana ? Sieis nacions ? Bordilhas radioactivas, aviacion, Smoby, CPE, ANPE, GDF, aiga, Jacques Legras, fuelheton eiglintenc, vaquí los subjectes d’aquesta setmana.


4Sieis nacions ? Lo torneg que pòrta mau son nom perque rachampa nacions veraias coma Escòcia, Gallas, Irlanda, Englatèrra, un estat que reconeis sas minoritats : Itàlia e un estat esquichaire de las nacions que lo constituisson : França. Es aqueste darrier, que son equipa es occitanò-catalana a mai de nonanta-e-cinc dels cent, qu'emportec fin finala lo torneg après sa vistòria dissàndes contra Gallas vint-un a sege.


4Bordilhas radioactivas. Au consèu dels ministres de dimècres, s'es dich que chalia enquadrar mielhs las bordilhas radioactivas de totas menas. En 2000, França ne'n produsec nòu cent setanta-v'uech milas mètres cubics.


4Aviacion. l'Union europenca, per lo biais de la comission de Brussèlas, a fach pareisser la lista de las companhias d'aviacion enebias. N'i a nonanta-e-doas mas la lista sarè actualizaa chasque tres meses.


4Smoby. L'entrepresa de joets vai sarrar doas fabricas en França que compta durbir sites de fabricacion en China que la man d'òbra li es mens chara. Encara d'obriers e de familhas que pòion crebar sus l'autar de la rendebilitat e dau profiech.


4La lucha contunha contra lo Contracte Premiera Embaucha. Encara chaumas e manifestacions a l'orizont que lo premier ministre vòu solament far d'amainatjaments mas pas retraire lo projècte. Vòu ben discutir, coma li demanda Chirac, mas per lo moment solament amb los patronasses e los parlementaris UMP. aquò's de dialògue !


4L'ANPE foguèc espinglaa per lo darrier rapòrt de la cors dels comptes que li demanda una reorganizacion, especialament per los rapòrts qu'entreten amb los ASSEDIC.


4V'onge millions d'abonats de GDF van veire crèisser lo prètz dau gas de cinc virgula v'uech dels cent, qu'es un pauc mens que l'aumentacion demandaa per l'entrepresa gasiera.


4Dimècres, èra la jornaa mondiala de l'aiga. Chau saupre que les reservas mondialas son estat divisaas per dos en vint ans. De mai, cincanta dels cent dels consumators s'inquietan de la qualitat maugrat que l'aiga foguessi lo produch alimentari lo mai contrarotlat. L'aiga dau robinet ista totun cent còps mens chara que l'aiga embotelhaa.


4Jacques Legras. L'òme de la camerà escondüa nos a laissat per anar faire sas blagas au paradis. Son umor fasia pissar de rire, qu'èra un trobador de la farseaa televisuala.


4Per lo cinquen viatge despiei 2001, los electors eiglintencs van estre rampelats a las urnas. Començon de conéisser lo chamin de la comuna. Après lo recors despausat per Gilbert Domeny, l'eleccion de Loís Abrard coma conselhèr municipau foguèc invalidaa.

Que s’es passat aquesta setmana ? Eleccions israelianas, escrutin ucrainian, Chirac que se'n va, De Villepin l'inflexible, manifestacions gigantas, Lion-Milan, Iter en debate public escondut, retengüa de La Garda, vaquí los subjectes d’aquesta setmana.


4Las cartas son redistribuïas en Israel. Lo partit creat per Ariel Sharon, Kadima, es arribat en testa de las eleccions legislativas. Los travalhistes son segond e lo Likhoud, la drecha israeliana se plaça solament cinquen. Un esper de patz es possible amb aquela configuracion. Ehoud Olmert, lo premier ministre per interim, deuria estre apelat per formar lo govern novèu.


4En Ucraina, las negociacions per trobar una aliança de govern son malaisias. Lo president Viktor Iouchtchenko receguèc recentament l'opausant pro-russa Viktor Ianoukovitch que son partit de las regions es en testa amb trenta dels cent de las votacions, puèi son ex-aliaa Ioula Timochenko que li a perèu passat davant amb mai de vint-e-dos dels cent, set ponches de mai que lo blòc dau chap de l'estat. Las tractacions van plan planet per una coalicion que sarè pas aisaa de trobar.


4Au som europenc de Brussèlas, Chirac es partit quora lo baron Ernest-Antòni Sellières prenguèc la paraula en englés. La pressa anglesa se trufa dau president francés pr'amor dau despart espectaculari de Chirac, aparaire ardent de la francofonia e de l'excepcion culturala francesa. Que se passaria dins l'emiciucle de l'assemblaa nacionala se los deputats de Corsega, d'Alsacia, de Bretanha, dau País Basque, de Catalonha e d'Occitània claquavon la pòrta chasque còp qu'un deputat emplea lo francés ?


4Lo premier ministre De Villepin es inflexible per impausar la flexibilitat que li demandan los patronasses. Coma Chirac li demandec de dialogar, decidissèc de reçaupre bèu premiers los patrons de las mai grandas entrepresas... qu'aquò es un dialògue constructiu e eficaç.
  I a pas de mai sord qu'aquèu que vòu pas entendre.

4Lo bruch per charrieras qu'es belèu pas pron fòrt, amb tres milions de manifestaires dins los passa-charrieras de França tota, tres mila a Gap dimarç passat... Jamai vist ! La mobilizacion es fòrta contra lo Contracte Premiera Embaucha. Mas, per lo moment, l'intransigéncia dau govern es tala qu'es completament embarrat dins la charriera bòrnia de sa testardisa.


4Lion-Milan es pas la linha de chamin de fèrrre mas l'aficha bela dels quarts de finala de la copa dels champions. Lo match nul 0-0 de Gerland dimècres assabora encara un pauc mai lo match dau tornar a Milan.


4Lo debate public sus Iter es lançat mai es de se demandar se los achamps son pas esconduts dau public, justament, que i a pas gaire d'informacions sus las possibilitats per los ciutadans de debatre e de donar son vejaire.


4La retengüa d'aiga de La Garda receguec un avís desfavorable per lo commissaire-enquistaire. Lo conse de Gap, Pèire Bernat-Ramond es pas content quora l'associacion d'aparament se felicita d'aquesta decision. Es pas aisat d'acontentar tot lo monde.