4 Dimarç, lo 3 d'octòbre de 2006. E bonjorn ! Bèla victòria, dissàndes passat per lo Gap Aups-auts Football Club. D'un biais agradiu, 3 a 0, prenguèron lo dessus còntra una equipa de Sant Priest mesa la testa sos l'aiga amb 2 buts dins lo premier quart d'ora. Atlan, bèu premier, tre la uechena minuta, après una traucaa de Machadò que forcèc la defensa a concedir lo còp franc, ajustèc lo lugarn de son pè gaucha e la claquèta de Lagalle, lo portier de Sant-Priest, poguèc tot bèu just desviar lo balon dins la telaranha dau canton de son but. Foguèc puèi Machadò, sus un còp de pè arrestat dau mesme Atlan que betèc una pichinèta lobaa au cuer e qu'enganèc Lagalle, que poguèc solament anar queire lo balon au fons dau ret. En periòde segond, Schulzendorf, après un relai Zobiri-Abdelali-Zobiri, marquèc a son torn sus una picha crosaa magistrala. Aquèla victòria permete a Gap de venir menaire solet de son championat amb tres ponches d'avança sus Frejus e Sant-Priest. A deman.

4 Dimècres, lo 4 d'octòbre de 2006. E bonjorn ! Aquesta dimenchaa, lo president de la Republica Francésa, Jaume Chirac, èra en vesita oficiala en Armenia. Demandèc a Turquia de reconéisser lo chaple de 1915-1917 que faguèc un milion e miei de mòrts dins la populacion armeniana. Aqueste país, que vòu dintrar dins Union Europenca, a totjorn pas reconeissut l'existéncia d'aqueste genocidi. Pechon país de 3 milions 200 mila estajants, Armenia compta una diaspora importanta de mai de quatre milions d'armenians exilats dins lo monde entre losquaus 450 mila en França. Lo chantaire francés d'origina armeniana Aznavorian venguèc profèta en son país sobretot despiei son ajüa remirable quora lo terratremol de 1988 que faguèc mai de 30 mila mòrts. A deman.

4 Dijòus, lo 5 d'octòbre de 2006. E bonjorn ! Dins la corregüa a l'investitura dau Partit Socialista per l'eleccion presidenciala de l'an que ven, ja dos abandons : Lionel Jospin e Francés Olanda se son retirats de la corsa e anoncièron l'un e l'autre lor decision de pas estre candidat a n'aquela investitura. Restan doncas en corsa Segolèna Royal, Domergue Strauss-Kahn e Laurenç Fabius que se declarèron oficialament candidats. La decision dau Jack Lang, dimarç completèc lo tablèu. Segolèna poiria belèu estre espoissaa per un afaire vielh : aquèu dau Rainbow Warrior, que s'es apres, en Nòva Zelanda, que Gerard Royal, lo fraire pròpri de la Presidenta de Peitau-Charantas, saria compromes perqu'auria plaçat la bomba que faguèc petar lo batèu de Greenpeace. A deman.

4 Divèndres, lo 6 d'octòbre de 2006. E bonjorn ! Amiante : victimas demandan justícia. Las chifras que fan paur. Per lo moment, solament un pauc mai de 30 mila dorsiers arribèron sus lo burèu dau FIVA, lo Fons d'Indemnizacion de las Victimas de l'Amiante. Amb 3 mila deceses per an, (35 mila en França entre 1965 e 1995), se'n poirian comptar 100 mila d'aquí a 2025. Lo grand procès penau de l'amiante risca de pas se far lèu que las responsabilitats s'espandisson sus mai d'une decenia e las victimas se comptan en desenas de mila. Se se poiria comparar aqueste dorsier a n'aquèu dau sang contaminat, onte i avia quauquas desenas de personas incriminaas e quauquas centenas de victimas, se veiria l'amplor de l'òbra. Chau saupre, totun, que se Euròpa reconeissèc lo caractère cancerigèna de l'amiante en 1978, es solament en 1996, detz-e-uech ans mai tard, que França prenguèc la decision de l'enebir. Bòna dimenchaa... A diluns que vèn.

4 Diluns, lo 9 d'octòbre de 2006. E bonjorn !
- Lo chap ministre turc Recep Tayyip Erdogan foragitèc la cria au quitatz-lo-fuec dau menaire dels separatistes qurdes de Turquia, Abdullah Ochalan, eisortant los rebèles de purament e simplament relenquir la lucha armaa contra las fòrças d'Ankarà.
- La junta militària que prenguèc lo poer en Tailanda lo 19 de setembre chausissèc lo generau a la retiraa Surayud Chulanont, 63 ans, per succedir au Chap ministre reversat Thaksin Shinawatra.
- Lo nòu Chap ministre conservator japonés Shinzo Abe jutgèc "extremament important" de melhorar las relianças de son país amb China e Corèa dau Sud, dins lo sieu premier discors de politica generala davant lo parlament. A deman.

---

ACTU Setmana dau dimarç, lo 10 d'octòbre au diluns, lo 16 d'octòbre de 2006


4 Dimarç, lo 10 d'octòbre de 2006. E bonjorn ! Dissàndes, l'equipa de França de balon tornèc metre los pès sus tèrra. Dins la qualificacion per l'Euro 2008, perdèc un but a zerò contra Escòcia. Sufís pas de dominar per ganhar. Los francéses aguèron la mai granda possession dau balon, mas trobèron pas l'oportunitat de marcar. Escòcia defendia ben e se Teiric Enric marquèc lo matche de sa piaa, Daviu Trezeguet passèc a costat de l'occasion de se rachatar ofèrta per Ramond Domenech au "bianconero" après la decepcion dau mondiau. Dins sa pola de qualificacion, França es desenant segonda amb sieis ponches darrier Escòcia premièra amb nòu ponches. A deman.

4 Dimècres, lo 11 d'octòbre de 2006. E bonjorn ! Esglandelhas dins lo vin. Brusselas donèc son fuec verde, tant per las apelacions contraròtlaas coma per lo vin ordinari d'utilizar aquèu metòde de vinificacion que consistís a apondre talhons de bòsc dins lo vin. S'agís d'asaptar la produccion viticòla per "faire lo vin dau consumaire", basta d'anar a l'encòntre dau gost d'aquí per satisfaire los cèus de las bochas forestièras. L'aganta-colhon consistís a bailar lo perfum de bota als vins conservats dins barricas d'inòx. Aquesta autorizacion fai pas l'unanimitat qu'avèm ja la mau-bofa e que i a belèu pas a apondre lo mau-bèure. A deman.

4 Dijòus, lo 12 d'octòbre de 2006. E bonjorn ! Dissàndes passat foguèc tuaa a Moscòu Anna Politkovskaia, jornalista independenta russa, reputaa per sa cubertura critica de la guèrra en Chechenia. Reportairitz mager a Novaia Gazèta, avia especialament escrich "Chechenia, lo desonor russe", puèi, mai recentament, vèn de parèisser "La Russia segon Potine" que li critica lo president russe e sa politica a l'esgard de Chechenia, amb las pròvas dels abuses e exaccions comeses per las tropas governamentalas contra civiles. Lo chaple pòt contunhar que lo Potine a la benediccion dels estats qu'esquichan lors minoritats. Ne'n coneissetz ben d'autres. Non ? A deman.

4 Divèndres, lo 13 d'octòbre de 2006. Dins l'afaire dels sensa-papiers de Cachan, s'es vist la fin de l'ocupacion dau gimnasi. Los tres cents cincanta ocupants levèron lo champ entre dissàndes e diluns amb l'esper de trobar condicions de vita decentas e belèu, per quauques uns, de veire lor situacion regularizaa. Autocars de la comuna los menèron vers estructuras d'auberjament provisòrias onte saràn seguits per l'associacion "França Tèrra d'Asile". Ce qu'es incredible, dins aquest afaire, es que lo vuedjatge de l'esquate aii agut luec davant d'aguer trobaas las possibilitats de tornar lojar las familhas expulsaas. Es un escandale complet que las gents siein presas per bestias dins una republica que se dis civilizaa. Bòna dimenchaa... A diluns que vèn.

4 Diluns, lo 16 d'octòbre de 2006. E bonjorn ! Plantu, lo caricaturiste dau "Monde" e de "l'Express" receguèc lo pretz de l'umor "vacha". Lo dessenhaire celèbre participava au vint-e-cinquen "salon internacionau de la caricatura e dau dessenh de premsa" que se debanava a Sant-Just-lo-Martel, en Vinhana n'auta. Lo prèmi qu'emportèc es una bòia veraia de detz-e-set ans que li dison "Justina". Dau temps dels detz jorns dau salon, dos cents caricaturistes dau monde entier foguèron auberjats en 'quò dels estajants, un bon mean de participar a la vita e de teissar liames amb la populacion d'aqueste comuna de dos mila cinc cents armas. Lo lemosin es un país dau bòn viure. Normau, coma nosautres, son occitans ! A deman.

---

ACTU Setmana dau dimarç, lo 17 d'octòbre au diluns, lo 23 d'octòbre de 2006


4 Dimarç, lo 17 d'octòbre de 2006. E bonjorn ! Fai pèna, totun, de vèire que siam dins una republica estranha. Divèndres passat, foguèc tornat elegit premier conse de Bordèu lo Sénher Alan Juppé. Condemnat dins un afaire que mostrava bèn que se trufava de sos administrats : aquèu dels emplecs fictius dau RPR a París, retroba son cheieràs de conse amb mai de 56 dels cent de las votz. Es de se demandar se lo pòple de Bordèu a pas de memòria e se se vòu far agantar tant coma lo foguèron los parisencs. Verai que Juppé, mesme se participèc, portèc lo chapèu per "un" edile encara mai n'aut plaçat ! Es pas lo premier còp qu'un repres de justícia tornar trobar sa plaça au solèu, mai es totun lamentable per la nòstra democracia. A deman.

4 Dimècres, lo 18 d'octòbre de 2006. E bonjorn ! La quita filha dau Domergue De Villepin que s'aficha dins una campanha publicitària, vaquí quauqua ren d'un pauc estranh. Verai qu'esperava passar inconhitò mas la semblança amb lo sieu paire es tant evidenta qu'èra malaisat d'escondre de longa sa situacion de manequin. Sus panèus gròsses de las vilassas se pòt vèire la filha dau premier ministre mas... vos fasetz pas de socit, es pas la campanha de las presidencialas que saria ja entamenaa, es simplament una circonstància fortuita. Chascun fai lo mestier que pòt, mai quora se dis ja que lo "show-bizz" a una tròp granda plaça dins la politica, un òme tant en vista coma lo premier ministre deuria estre mai prudent en mandant sa pròpria filha dins lo grand banh mediatique. A deman.

4 Dijòus, lo 19 d'octòbre de 2006. E bonjorn ! Lo pretz Nobel de la patz foguèc atribüit au banquier dels paures, l'escais nom donat a Muhammad Yunus, lo bangladai. Aquèl òme es l'artisan dau micro-credit que permetèc a mai de sieis milions de bangladais deseritats de sortir de la lor misèria. En Yunus a 66 ans e es lo fondator e lo president de la Grameen Bank, un organisme de prest als paures que permetèc a milions d'exclauses dau sistèma bancari tradicionau de menar una vita independenta e d'eschapar coma aquò a la misèria. Exportat dins mai de quaranta paises, son concèpte modèrne li vau encuèi aquesta recompensa fòrça ameritaa dau pretz Nobel de la patz. "Pensam que la pauretat a ren de vèire amb una societat umana civilizaa, es de sarrar au musèu", dis aquèl òme savi. A deman.

4 Divèndres, lo 20 d'octòbre de 2006. E bonjorn ! Lo drech francés es pas asaptat als contencioses de massa. Au tribunau dau comèrci de París, foguèron pausats divèndres darrier 12 mila cinc cent vint-un dorsiers de planhs contra los tres operators gròsses de telefonia mobila : Bouygues, SFR e Aurenja, sopçonats d'entenda illicita. Ja, lo 1er de decembre de 2005, lo consèu de la concurréncia avia infligia una emenda recòrd de 534 milions d'euros per lo mesme motiu a las tres societats. Es l'UFC Que Choisir, l'Union Francesa de la Consumacion qu'achampèc totes aquelos dorsiers : 4 728 contra Aurenja, 4 187 contra SFR e 3 606 contra Bouygues. Lo prejudici mean es estimat a 65 euros per persona. Lo totau dels domatges e interestes se poiria montar a 820 mila euros. Bòna dimenchaa... A diluns que vèn.

4 Diluns, lo 23 d'octòbre de 2006. E bonjorn ! Las platanas dau canau de las doas mars son malautas. Aquèla malautia es pas novèla, es un champairòu qu'ataca los aubres e, per lo moment, avem pas trobaa la paraa, lo remèdi eficaç contra lo mau. Segon los cherchaires, saria l'aiga dau canau que serviria de vector per la transmission de la malautia. Mai de 50 mila aubres, d'esséncias diferentas, mas ja a dominanta de platanas, foguèron plantats quora la bastison dau canau, sos l'autoritat de Riquier, lo genial inventor d'aquèla via meravilhosa. Classifiat coma patrimòni de l'umanitat despièi 1996 per l'UNESCO, lo canau se pòt mau concèbre sensa los chamins ombrius e las platanas gigantas que lo bordan. La malautia es arribaa, ce sembla, d'America, dau moment de la segonda guèrra mondiala. Las caissas d'armas èran fachas dins la fusta d'una platana que, èla, resistís bèn au champairòu. Mas la platana que viu en 'quò nòstre a pas la capacitat a resistir a aquèlas atacas. A deman.