ACTU Setmana dau dimarç, lo 6 de març au diluns, lo 12 de març de 2007


4 Dimarç, lo 6 de març de 2007. E bonjorn ! Presents immobilers. Lo canard enchaená dau dimècres 28 de febrier fa paréisser una pagina plena sus lo bèu afaire immobilier de Micolau e Cecília Sarkòsy. En 1997, lo premier conse de Neuilly foguèc bèn avantatjá per lo promotor mager de la vila. An pogú esparnhar coma aquò dos milions de francs (sieie 300 000 euros) per crompar lor duplex e realizar òbras d'amainatjament. L'apartament, situí dins lo Victòria XXI, residéncia n'aut de gamma bastia sus l'illa de la Jata, s'espandís sus 216 virgula 71 mètres carrats e dos estancis : planpè e premier. L'òrt-terrassa de 50 mètres carrats susplomba la Seina. L'ensemble costa 5 milions setanta-e-cinc mila francs (sieie (v')uech cent setanta-e-sieis mila euros). Lo promotor fai present de l'amainatjament dels dos apartaments en un duplex per la soma de 925 mila francs TTC. Las òbras d'embeliment se montan a mai de nòu cent mila francs que lo coble Sarkòsy se veirè facturar a quatre cent quaranta-e-set mila set cent setanta-e-dos francs virgula vint-e-cinc, aredonís suucòp a 400 mila euros TTC. Coma se tot aquò sufisia pas, l'ostau es revendú nòu ans après amb una valor apondüa de 122 dels cent : 1 942 mila euros (sieie 12 virgula 74 milions de francs). A deman.

4 Dimècres, lo 7 de març de 2007. E bonjorn ! Lo tornar de Polnareff. Après 34 ans d'abséncia, Michel Polnareff torna sus scena. Après estudis musicaus oblijats per son paire, obten a (v')onge ans le Premier Pretz e la medalha d'aur de solfègi au Conservatòri nacionau superior de musica de París. Recebe un pretz especiau de la critica en 1966 au concors dau Festenau de la Ròsa d'aur d'Antíbol per "Love me, please love me". Agressá sus la scena de l'Olimpia en 1970, tomba en depression e seguís una cura de sòm. Sa virilitat mes en dobte, responde a las atacas en escrivent "Je suis un homme". En 1972, escandaliza lo monde en pausant cuòu a l'èr. Escrochá e arroiná per son conselher financier en 1973, s'exilia als Estats-Unís. Après l'aguer anonciá en mai de l'an passá, torna en 'quò nòstre au mes de febrier, pròchi Lemòtges, per adobar son tornar sus la scena francésa. Sarè a Lion los 24 e 25 de març, a Niça los 29 e 30 de junh e Marselha los 3 e 4 de julhet. A deman.

4 Dijòus, lo 8 de març de 2007. E bonjorn ! Divèndres passá, 2 de març, s'achampèc lo Conselh municipau de Gap. Chalia elegir lo premier conse novèu de la comuna, après la demission de Pèire Bernat-Reymond, que devia eschapar a l'acumulacion dels mandats. La logica foguèc respectaa, maugrat la revòlta de l'UMP que volia pas laissar la vila dins las mans d'un PRG. Dòna Schreiber-Fabian s'èra presentaa contra Rogier Didier e aguèc pas de rogir de sas nòu votz obtengüas contra las vint-una dau successor de PBR. Bernat Jaussaud otenguèc 5 votz per la senèca unia, Joan Guiboud-Ribaud 2 per los dissidents dau PRG e l'i aguèc dos bulletins blancs. La vila passa a senèca sus lo papier, mas contunharè d'estre governaa a drecha, que i a pas gaire de diferéncia entre las politicas e los programas dau senator UMP (ex UDF) e dau sieu daufin PRG chausí en 2001... per pas riscar la perda de la vila que Sénher Bernat-Reymond tenia ja despiei doge ans, fòrça relucaa per Daniel Chevalier e lo PS. A deman.

4 Divèndres, lo 9 de març de 2007. E bonjorn ! Uvèrn especialament doç. Jamai s'eran vistas, despiei 1950, temperaturas tant clementas ! La prima es pròche e per los meteorologistas, que trabalhan sus un periòde uvernau decembre-janvier-febrier, es vengú lo temps dels bilanç. "Amb una temperatura meana superiora de 2 virgula un grases a la normala sasonièra, l'uvern 2006/2007 es lo mai chaud observá en França despiei 1950", atesta l'Institut meteorologica. "Se la temperatura meana de decembre passèc leugierament la normala amb + 0,4 gras, aquelas de janvier e febrier la despassèron chascuna de 3 grases", nòta Meteo-França. Recòrds de chalor foguèron batús dins mai d'una region, especialament los 18 e 19 de janvier, segon l'establiment publique. Meteo-França sotalinha : "Aqueste uvern remarcablament doç seguís un endarrier 2006 excepcionalament chaud, jamai observá despiei 1950 e sensa dobte jamai viscú despiei mai d'un segle." E n'i a que se pausan encara la question dau reschaufament climatique ! Bòna dimenchaa... A diluns que vèn !

4 Diluns, lo 12 de març de 2007. E bonjorn ! La Sabença de la Valèia a Barcilona. L'associacion barcilonenca "Sabença de la Valèia" se pausa la question de sa perenitat. Tres presidents se succedissèron dins l'annaa e lo dobte seguís la remesa en question. Lo president actuau, Joan-Maria Piclet, se planhe d'estre subrecharjá de trabau que l'associacion li manja mantunas oras chasque jorn. Lo problèma dau benvoler se pausa de mai en mai. Es una question centrala per la sobrevita de nombrosas associacions. Pèire-Martin Charpenel, lo reire president que baileèc 20 ans la "Sabença de la Valèia" precisa : " L'associacion es una entrepresa vertadièra e sa forma associativa fai qu'es fragila. Es par aquò me pensavo, despiei 3 o 4 ans, que la creacion d'una SCIC (Societat Cooperativa d'Interest Collectiu) èra lo biais melhor d'evoluar e de perlonjar ce fach precedentament." Lo nom occitan va disparéisser au profiech d'una apelacion mai contemporanèa e esquichaa au rotlèu compressor de la modernitat : "Les Colporteurs de Paysages". S'agís totjorn d'aparar e d'enauçar lo patrimòni, mas plus ges lo lingüistique. Ne vau pas la pena ? A deman.

---

ACTU Setmana dau dimarç, lo 13 de març au diluns, lo 19 de març de 2007


4 Dimarç, lo 13 de març de 2007. E bonjorn ! A mens de dos meses de las eleccions presidencialas, los sondatges se multiplian. Lo BVA Aurenja Daufinat-Liberá dau 8 de març mostra un raprochament de Francés Bairou sus los dos menaires Segolèna Royal e Micolau Sarkòsi. Lo baile de l'UDF que participava i a pas gaire a la majoritat presidenciala vòu far creire que son partit es au centre. Se dis capable de prendre un premier ministre socialista. Lo liberalisme asatá empacha pas lo capitalisme deschabestrat que laissa tant de monde de caire. Vèio pas (m')onte lo Bairou se desmarca de la drecha pura e dura dau Sarkòsi. Amb un Partit Socialista que sa candidata fai pas tròp nimai vers son ala senèca altermondialista, me creo bèn que siam embarrás per un bon moment dins la democracia sociala, rebat pallós dau capitalisme. Son nombroses mai fan pas gaire als sondatges aquelos que viran l'eschina au liberalisme inegalitari que nos bailea despiei tant d'annaas : Bové, Buffet, Laguiller e Besancenòt. A deman.

4 Dimècres, lo 14 de març de 2007. E bonjorn ! Dijòus passá, lo 8 de març, Micolau Sarkòsi indicava que volia crear un ministèri novèu, aquèu de l'imigracion e de l'identitat nacionala. En seguia d'aquèla prepausicion, i aguèc fòrça reprovacions. Chassa sus las tèrras de la drecha extrèma, estigmatizacion dels estrangiers... Mas auvissèro degun parlar de l'incongrüitat de parlar d'identitat nacionala au singulier dins un estat que ne'n compta tant. Las identitats nacionalas son tant coma i a de pòples en França, o de lengas territorializaas dins la Republica. Verai que l'Estat jamai vouguèc reconeisser aquèsta diversitat e parla totjorn, au contari, d'unicitat de la Republica, esquichant e neant tota existéncia de minoritats nacionalas coma aquèlas dels alsacians, bascas, bretons, catalans, còrses, flamans o occitans ! Es aquèla diversitat que fai la richèssa de la Republica Francesa. Tant que l'auran pas compres, contunharan de s'embarrar dins aquèu centralisme ferotge. A deman.

4 Dijòus, lo 15 de març de 2007. E bonjorn ! S'aprocha : la manifestacion gròssa per la lenga occitana. Après-deman, dissande, a Besiers se va debanar un eveniment que farè data dins l'istòria dels identitats esquichaas per l'Estat francés. Lo 17 de març, per charrièras de la vila lengadociana, los aupencs saran cotria los provençaus, los gascons, los auvernhats, los letmosins e los lengadocians per demandar una reconeissença veraia de nòstra lenga e de nòstra cultura. Dins los medias, dins l'ensenhament, dins la creacion e dins la vita publica, volem una preséncia afortia de l'occitan tant coma per las autras lengas minorizaas de l'exagòne. La lenga d'òc, richa de sa diversitat dels Aups als Pirenèus, coma disia Frederic Mistal, vòu tornar trobar lo respècte e la dignitat qu'auria jamai degú perdre. A Carcassona, lo 22 d'octòbre de 2005, eriam doge mila dins lo passa-charrièra. Sarè encara mai gigant, après-deman, amb la convivéncia e la festa tant coma a totjorn sachú viure lo pòple fièr dau mieijorn. A deman.

4 Divèndres, lo 16 de març de 2007. E bonjorn ! Bill Gates, totjorn lo mai riche. La revista "Forbes" vèn de faire paréisser, coma chasqu'an, la lista dels miliardaris en dollars que compta la planèta. Son nòu cent quaranta-e-sieis amb 15 franceses. Chau saupre perèu que la creissènça meana d'aquèlas fortunas es de 35 dels cent. Se pòt dire qu'es pas lo cas de tot lo monde e, se los mai riches son encara mai riches, chau que i aii de mai en mai de paures de mai en mai paures. Lo principi dels tians comunicants marcha per l'argent tant coma per l'aiga. 56 miliards de dollars, la fortuna dau solet Bill Gates, fondator de Microsoft, representan quauqua ren coma 280 miliards de francs ou per aquelos que parlan encara en francs ancians : 28 mila miliards. Lo mai riche dels franceses es Bernard Arnaud, seten dins lo classament mondiau amb una fortuna personala establia a 26 miliards de dollars. La segonda es Liliane Bettencourt amb 20 miliards 700 milions de dollars de patrimòni. Sabo pas, se escrivo a n'aquesta revista en lor disent mon patrimòni, se me van metre dins lor classament o se li figuraran un jorn la pechona etiopiana o l'enfant de la favèla de Rio que creban de fam dau temps que d'autres fan ripalha sensa vergonha ! Bòna dimenchaa... A diluns que vèn !

4 Diluns, lo 19 de març de 2007. E bonjorn ! Assisas de Peirigus. 30 ans de reclusion criminala per lo murtre dels dos inspectors dau trabalh, vaquí lo verdicte ordoná per la cort d'assisas de Dordonha divèndres, lo 9 de març. Claude Duviau avia tuá, en setembre de 2004, Sylvie Trémouille e Daniel Buffière a bot tochant, sensa somacion, amb balas de puerc fèr. Los dos contraròtlaires dau trabalh eran vengús inspectar lo tenement dau païsan. L'avocat generau avia requerí la perpetuitat disent que : "s'atacant a foncionaris que fasian solament lor mestier, es l'Estat e la societat que Duviau a atacás." Mai la juraa l'a pas seguí, sensible belèu a la plaidearia de mestre Eric Visseron : "La perpetuitat, es ce demandá per tuaires de pechons, serial killers o monde que talhan cadabres en morcèus." L'aparaire rementèc perèu la fragilitat psichica dau reire militari, assalhí per dificultats financiaras, tombant dins la depression dins qu'a perdre pè completament. Lo sindicat Snutef-FSU de l'inspeccion dau trabalh estimèc que justícia foguèc rendüa. A deman.

---

ACTU Setmana dau dimarç, lo 20 de març au diluns, lo 26 de març de 2007


4 Dimarç, lo 20 de març de 2007. E bonjorn ! L'aiga es un produch de premiera necessitat. Se'n consuma, en França, 164 litres per jorn e per estajant. Es un produch que chau pas degalhar. Las resèrvas son pas inagotablas, l'avem vist quora los estius de secharessa, que riscan de se multiplicar. Son pretz varia dau simple au doble segon los despartiments. Aquò oscilla entre 1 euro (v')uechanta e 4 euros vint lo mètre cubique, ce que representa una inegalitat fòrça importanta sus lo territòri... qu'existís pas aquí de perequacion entre los endreches. Dins nòstra region, la consumacion es auta mas lo pretz perèu pr'amor las conduchas que costan mai char per estajant qu'a París onte lo mètre de bornèu alimenta mai de foiers. Las distorsions son tant fòrtas que se pòt demandar se, dins aqueste domani, una intervencion estatala o europenca saria pas benvengüa. A deman.

4 Dimècres, lo 21 de març de 2007. E bonjorn ! A Besiers, dissande passá, un passa chariera mostre achampèc tot ce qu'Occitània compta coma aparaires, enauçaires e enançaires. Felibritge (lo movement fondá per Frederic Mistral) cotria las associacions occitanistas : I.E.O. (Institut d'Estudis Occitans), F.E.L.C.O. (Federacion dels Ensenhaires de Lenga e de Cultura Occitana), Oc-bi (associacion de parents d'escolans), Calandretas (las escòlas immersivas en occitan) e la Joventut d'ÒC (movement de joves, coma son nom l'indica) an manifestá sus la plata-forma seguenta : los medias (un servici public de radiò e de television en occitan), la creacion (una politica especifica en favor de l'edicion, dau teatre, de l'espectacle viu, dau cinemà e de la musica), l'ensenhament (una politica d'ofèrta generalizaa) e la vita publica (respècte de la toponimia, senhalizacion bilingüa e utilizacion de l'occitan tant dins los luecs publiques coma dins la vita sociala). A deman.

4 Dijòus, lo 22 de març de 2007.  E bonjorn ! Rena dels gendarmas. Coma en 2001, un rampèu a un movement exagonau es mandá. Una letra duberta signaa per un "collectiu de gendarmas esmariciás" foguèc mandaa als medias per lor dire lo mal-estre prefond dels gendarmas de basa. Denoncia forra-borra "las retiraas que s'aluenchan", "la manca de personau", "las condicions de trabalh tròp pesugas", "la corsa a las estatisticas", "una grasilha indiciara de sos-oficiers en sota d'aquèla dels policiers"... Per un sos-oficier iserenc, "los gendarmas son belèu esmariciás mai son sobretot lasses e inquiets per lor avenir. Lor demandan de mai en mai de resultas sensa lor provesir los meians apropriás." La colèra retròna sus interret e lo site "gendarmes-en-colere.org" es envaï de corrieus sovent anonimes que los autors an paur de las sanccions que poirian lor tombar sus lo nas. A deman.

4 Divèndres, lo 23 de març de 2007. E bonjorn ! Professors esmariciás. Los professors descoleran pas. Se dison victimas d'una agression de la part dau govern. Las cinc mila supressions de pòstes previstas per la dintraa 2007 s'apondon a la modificacion de l'organizacion dau lor trabalh. Lo decret De Robien que perlonja lo temps de trabalh dels ensenhaires dau segondari deuria pas subsitir a la presidenciala. Qualifiá per lo quite Xavier Darcòs, ancian ministre de l'ensenhament escolar, de "decision pron brutala", aqueste decret provoquèc un maucontentament dels gròsses dins collègis e licèus. Los professors veian mau coma se pòt melhorar l'ensenhament se contunha l'espirala de las supressions dels pòstes e lo mespretz dau govern fàcia als ensenhaires. Bòna dimenchaa... A diluns que vèn !

4 Diluns, lo 26 de març de 2007. E bonjorn ! Joan-Maria Le Pen persecutá per lo fisc. Lo candidat dau Front Nacionau a la presidenciala fai l'objècte, de longa, d'un agachament ponchú dels servicis fiscaus. Verai qu'es pas aisá de cernar la fortuna reala dau miliardari qu'a totjorn vougú escondre los chifres exactes tochant son patrimòni. Ce certan es la possession d'un chastèu a la bèla cima de la còla de Sant-Cloud, que li disen Montretout, vista imprenable sus la vau de Seina, d'una valor de mai de sieis milions d'euros. Possèda puèi per un pauc mai de cinc milions d'euros de parts (la meitat) dins lo champanha Borson, un dels sieus amics. Chau apondre la maison dels parents a La Trinitat de Mar, que costa mens d'un milion d'euros e diversas liquiditats malaisaas d'avalorar. Entre loiers sos avalorás, argent liquide pas justifiá e rendas borsièras eissubliaas, los agents dau fisc an ben de mau per avalorar lo patrimòni reau dau ciutadan Le Pen. A deman.

---

ACTU Setmana dau dimarç, lo 27 de març au diluns, lo 2 d'abriu de 2007


4 Dimarç, lo 27 de març de 2007.   E bonjorn ! Divèndres, lo 23 de març, se debanèc au Conselh Generau dels Aups Auts e sus la demanda dels quite conselhers generaus, una conferéncia sus los OGM. Invitá perèu per l'associacion "Vigiléncia OGM 05", lo Sénher Crestian Vélot, cherchaire e mestre de conferéncia au CNRS, foguèc presentá per Aguste Trufèma, President dau Conselh Generau zerò-cinc e lo President de l'associacion organizatritz. Entamenèc sa dicha en destriant ben las categorias d'OGM que n'i de totas menas : aquelos de la rechèrcha aplicaa, dau domeni medicau e aquelos que nos interessan lo mai, los de l'agro-alimentari, perque son arribás dins nòstras sietas. Puèi dissèc la definicion de ce qu'es un OGM e desvolopèc pendant vint minutas un cors de biologia dins la vulgarizacion perfiecha dau saberut que sap far passar son saber. Aquèu moment de teoria foguèc fòrça apreciá, ben documentá e ben illustrá. Istava plus que de conéisser las riscas qu'encorram en utilizant aquelos organismes. Es pas possible de se pas engatjar quora sabem las modificacions mager de natura qu'implica la mesa en cultura per champs d'aquelos OGM. Lo principe de precaucion deuria prevaler, mas l'influéncia de las multinacionalas de l'agro-alimentari e dels laboratòris farmaceutiques nos entraïna dins una espirala deschabestraa que l'òme mestrea pas mai ! A deman.

4 Dimècres, lo 28 de març de 2007. E bonjorn ! Un escoope que n'es pas un. Alan Bayrou se declara candidat a las legislativas. Dissande passá, dins la sala dels achamps de l'ostalaria "Las Bartavèlas" a las Cròtas, lo premier conse UMP de Briançon anoncièc oficialament sa candidatura dins la circonscripcion segonda dels Aups Auts, après un suspens insostenible de quatre meses despiei lo moment que son partit li avia acordá son investitura. Son objectiu premier es l'eleccion de Sarkòsi a la presidenciala, dissèc Bayrou. Après un rescontre amb la premsa, se debanèc l'achamp publique animá per lo senator-conse de Marselha Joan-Glaudi Gaudin. Sostengú perèu per Enrièta Martinez, Victòr Benrenguel o Richard Sirí, Alan Bayrou dis pas aguer encara chausí son suplent. Avís als amators. A deman.

4 Dijòus, lo 29 de març de 2007.  E bonjorn ! Los candidats gròsses a la presidenciala s'enjalan de cacaracas frenetics, de bandièras patrioticas e de Marselhesas nacionalistas. Un embarrament coma aquèu me pareisse dangeirós que lo nacionalisme estrech de Le Pen e De Villiers es pas luenc dins aquelas presas de pausicion qu'esquichan França dins un ressarament d'un autre temps. Francés Bayrou afirma son desacòrd sus aquèu ponch cotria José Bòvé e Dominique Voynet, los mai engatjás en favor de las minoritats culturalas e lingüistiques de l'exagòne. França a pas una identitat mas identitats multiplas. Tau lo jau e la jalina quilhás sus un molon de femier, Micolau e Segolèna fan la genufleccion davant lo drapèu tricolor. Son pas encara convinçús que França es multipla e richa de sa diversitat. Nosautres, occitans, cotria bretons, còrses, alsacians, catalans, bascas... sarem aquí per lor rementar. A deman.

4 Divèndres, lo 30 de març de 2007. E bonjorn ! Dissande passá, França 3 difusissèc un telefilme de Franck Apprédéris titolá "Nous nous sommes tant haïs". Virá en 2005, contava l'istòria d'un coble franco-alemand quora la naissença de l'idea d'Euròpa. Jean Monnet e Robert Schuman aguèron aquèla idea un pauc fòla a l'epòca d'una Euròpa que se faria plus jamai la guèrra. Foguèc la creacion de la CECA (Comunautat Europènca dau Charbon e de l'Acier). La filha de Romy Schneider, Sarah Biasini, joava lo ròtle de Maria, dòna jova qu'avia agú, dau temps de la guèrra, una liason amb Jürgen, un jornaliste alemand. Aquest' òme, estrambordá per l'idea europenca, ignorava l'existéncia dau sieu fiu Pèire. Lo coble politique franco-alemand d'encuèi, ier au còr de la naissença d'Euròpa coma entitat vertadièra, poiria ne'n prendre de la grana dins aquelos jorns que se festea lo cinquantenari d'aquèla construccion, au luec de la desvirar vers un liberalisme deschabestrá. L'idea d'una constitucion es bòna, mai chaudria, per la faire, una constituenta veraia, aquèla dels pòples d'Euròpa ! Bòna dimenchaa... A diluns que vèn !

4 Diluns, lo 2 d'abriu de 2007. E bonjorn ! L'imbroglio contunha a l'entorn de l'arrestacion de 15 marins britaniques. Eran dins las aigas territorialas d'Iraq o d'Iran ? Las autoritats britanicas asseguran que se trobèron a l'interior de las aigas territorialas iraquianas quora foguèron agantás. Un aut responsable militari iranian, lo generau Alizera Afshar afirmèc au contrari que los marins, capturás divèndres, lo 23 de març, dins lo nòrd dau gòlfe e transferís a Teeran avian "avoá" estre dintrás illegalament dins las aigas territorialas iranianas. Apondèc : "Avem las pròvas que mostran que foguèron arrestás dins las nòstras aigas territorialas." Coma se pòt pensar, a l'epòca dels radars ipersofisticás e de la susvelhança per satellite, que se pòt pas saupre qui mentís e qui dis la veritat ? Pòio pas creire qu'avem pas la possibilitat d'o saupre ! A deman.


Michèu Prat