ACTU Setmana dau dimarç, lo 28 de novembre au diluns, lo 4 de decembre de 2006


4 Dimarç, lo 28 de novembre de 2006. E bonjorn ! Au mes de novembre de 1 989, se ratifiava la convencion internacionala dels dreches dau mainat. França refusèc de ratifiar l'article 30... pr'amor parlava de las lengas e donc « a pas de s'aplicar en rason de l'article 2... » Per festear aquesta convencion, la setmana dau 20 de novembre de 2 006, l'associacion "les petits citoyens" realizèc un trentenau de clips amb una ajüa institucionala fòrta. Mestres e professors son encoratjats a anar cherchar elements per animar sesilhas d'educacion civica per far conéisser e comprendre los dreches dels mainats. Se poiem paiar lo plaser d'una pausa de pantaiaa ? Be sarè doç de pensar a ce que sarè un clip sus lo drech d'aprendre las lengas regionalas amb meians vertadiers. Mas tornem dins la realitat : d'aqueste... èra pas question ! A deman.

4 Dimècres, lo 29 de novembre de 2006. E bonjorn ! Lo Jòrgi Frêche, president de la region Lengadòc-Rosselhon, resquilhèc encara un còp. Tenguèc prepauses racistes au subjècte de la compausicion de l'equipa de França de balon. « I a nòu negres sus onge, la normalitat saria que n'i aguessi tres o quatre. » Aquèl òme es costumier dau fach pr'amor es pas lo premier viatge que derapa coma aquò. Après l'episòdi dels Harkis tractats de sos-òmes, lo Jòrgi Frêche s'èra desencusat. Mas aqueste còp, lo faguèc pas. La condemnacion es quasi unanima. Los verdes e comunistas denoncièron perèu lo dire dau premier conse de Montpelhier. Li resta plus que sos partisans, que bailea d'una man de fèrre la seccion socialista d'Eraut, per lo sostenir. Risca l'exclusion dau partit socialista, que n'es ja passat pròche mai d'un viatge, ce que saria la mendre de las sanccions. A deman.

4 Dijòus, lo 30 de novembre de 2006. E bonjorn ! La violéncia de certans suportaires dins los estadis de balon redon es vengüa insuportabla. Coma mesuras d'eradicacion dau fenomène foguèron jamai presas, lo problèma s'es pas reglat, mas, au contrari, s'es enverinat. A la diferéncia d'Englatèrra que prenguèc, tre la començanças dau oliganisme, lo buòu per las banas, lo club parisenc, qu'es pas lo solet, mas lo premier concernit en França, a chaugut esperar dinsqu'a l'afaire recent de violéncia per intervenir d'a fons sus las derivas racistas e antisemitas de certanas bandas pròchi de la drecha extrèma. Dissàndes passat, sortèc liure de son audicion auprès de la polícia de las polícias, l'Antòni Granomort, lo policier auvit coma testimòni assistat, que tuèc dijòus passat, quora portava secors a un espectator jusieu, un suportaire dau PSG. Foguèc retengüa la deféncia legitima. Per la patz dins las tribunas, Micolau Sarkosy, lo ministre dau dedins, anoncièc tre dissàndes mesuras fòrtas de fermetat. A deman.

4 Divèndres, lo 1er de decembre de 2006. E bonjorn ! Las femnas ne'n lor saol. Chasque tres jorns, una femna defunta en seguia de violéncias conjugalas dins la França metropolitana. Es ce que revelèc lo darrier recensament nacionau de las mòrts violentas. Violaas, batüas, agarrias, las femnas n'an lor pron. Lo Comitat Nacionau per los Dreches de las Femnas (C.N.D.F.) rementèc aquelas chifras quora la manifestacion que se debanèc a París dissàndes passat. La pòrta-paraula dau Comitat, Suzy Rojtman declarèc : « demandem fin finala la creacion, coma en Espanha, de tribunaus de la violéncia a l'encontra de las femnas amb competéncias penalas e civilas. » Es un problèma politique e de societat. Totes los partits de senèstra èran representats dins lo passa-charrièra qu'achampèc cinc mila personas segon los organizaires, set cents segon la polícia.
Bòna dimenchaa... A diluns que ven.

4 Diluns, lo 4 de decembre de 2006. E bonjorn ! Pèire Gemayel, ministre de l'industria dau govern libanés foguèc assassinat lo 21 de novembre. Fiu de l'ancian president libanés Amine Gemayel, neissut lo 24 de setembre de 1 972 -avia donc 34 ans- aqueste òme jove s'èra totjorn battut per la sobeiranetat dau Liban e còntra la man mesa de l'estat sirian sus lo país dau cèdre. L'atemptat que ne foguèc victima es lo premier d'un tipe novèu. Quora, de costuma, se debanavan a l'explosiu o a la veitura enlecaa, aqueste còp, aguèc luec en plen jorn, dins una charriera animaa. Percutaa per un autre veïcule, la veitura de Pèire Gemayel foguèc la cibla d'armas automaticas provesias de silencioses. Son tres tuaires sortits de la veitura-aret que cometèron l'assassinat. La Siria, un còp de mai, es mostrat dau det per la comunautat internacionala. A deman.

---

ACTU Setmana dau dimarç, lo 5 de decembre au diluns, lo 11 de decembre de 2006

4 Dimarç, lo 5 de decembre de 2006. E bonjorn ! Dissàndes de sera se debanava a Jausiers, dins la sala de las festas, un baleti organizat cotria per l'I.E.O. e l'associacion "Mantendrem". Los musicaires de "La Cisampa" pòion joar musicas per dançar dels Aups quasi quatre oras de temps sensa donar dos còps lo mesme morcèu. Entre rigodons, escotichas, polcas, mazurkas, valsas, corrèntas e contradanças... i de que s'amusar. L'après-dinnar, un estagi avia permes a n'aquelos que lo volian d'aprefondir lor coneissança dels passes d'aquelas danças tradicionalas. Bailejat per Mi-Jò Allard, aqueste estagi foguèc un moment de convivéncia mager. La seraa, un quarantenau de personas venguèron balar. I aguèc perèu una animacion per lo grope "Mantendrem", quatre personas acompanhaas a la guitara per Laurenç Chiardòla que chantèron chançons de la Valèia. Puèi i avia encara lo Patric Erard que nos esmouguèc fòrça amb sa sansonha e sa votz plena de la sensibilitat de las nòstras montanhas occitanas. A deman.

4 Dimècres, lo 6 de decembre de 2006. E bonjorn ! La setmana passaa se declarèron candidats a l'Elisea lo Francés Bayrou e, a l'investitura de l'UMP, lo Micolau Sarkosy. Foguèron pas d'escoops que sabiam ja ben la volontat dels dos òmes de se presentar. De son Bearn natau, lo Francés Bayrou anoncièc sa candidatura a la presidéncia quora lo Micolau Sarkozy faguèc aquò dins los medias regionaus. Coma per lo Partit Socialista e sa championa Segolèna Royal, ista plus que de veire las promessas que nos van far los uns e las autras. Aquelas promessas engatjaran, ben segur, qu'aquelos que las escotaran ! N'ai mon confle d'aquela vedetizacion de la vita politica. Aurieu enveia d'escotar puslèu discorses concrets sus la vita dau monde e las mesuras de prendre per una societat mai justa e solidària qu'aqueste betisier quotidian de frasas pichonas e de politica politiciana. A deman.

4 Dijòus, lo 7 de decembre de 2006. E bonjorn ! La TNT, comprenetz la Television Numerica Terrestra curbirè normalament en 2009 tot lo territòri de la Republica francesa levat UN despartiment, los Aups Auts. Siam pas ges dins lo vagon de coa, siam completament eissubliat dau trinc TNT. Segon Domergue Rós, gapian d'origina e membre dau Comitat Estrategique per l'Economia Numerica mes en plaça per Jaume Chirac : « Dins aquèste despartiment, l'avenir es puslèu a la cubertura per satellite. » Chau saupre que lo mòda actuau de television dich "analogique" aurè dispareissut fin novembre de 2 011, dins cinc ans a pena. Alora, passarem encara un còp a la trapèla e l'amainatjament dau territòri contunharè de se faire a París o prendran un jorn en compte l'especificitat dau despartiment nòstre. Es pas forçaament d'istar fòra la modernitat, coma lo mostra, per exemple, lo projècte WiMAX, qu'una experimentacion liaa a n'aquesta tecnologia novèla sarè mesa en plaça a l'encòp a Mont Genèbre e a Gap. A deman.

4 Divèndres, lo 8 de decembre de 2006. E bonjorn ! Per lo moment, Micolau Hulot es pas candidat a la presidéncia de la Republica francesa. Ben que creditat dels detz dels cent de las intencions de votacion, laissa planar lo dobte tochant a son engatjament dins la corregüa a l'Elisea. Son pacte ecologique, que recuelhís ja dos cent mila signaturas, mostra que l'aparament de la planèta es quauqua ren que comença d'estre pres en compte per l'opinion publica. Chau mercear a n'aqueste prepaus lo trabalh dels precursors coma Renat Dumont e dels ecologistes en generau, coma los verdes que mostran despiei decenias que lo desvolopament duradís dèu prendre lo pas sus la vista a cort nas que nos mena drech a la paret. Hulot assegurèc divèndres passat qu'acceptaria degun pòste de vice-chap ministre. Dissèc dimenja passa que los candidats declarats prenguessin pas en compte sas demandas per la sobrevita de la planèta e de l'umanitat, saria leste de s'engatjar. Bòna dimenchaa... A diluns que ven.

4 Diluns, lo 11 de decembre de 2006. E bonjorn ! La vesita dau Papa Beneset lo Segen en Turquia durèc quatre jorns e s'achabèc divèndres, lo 1er de decembre. La vesita foguèc marcaa per lo gèste de preièra dau Papa a la Mosquea Blava. Virat vers La Mèca, semblava prear per una intercession o faire una preièra universala. Lo Vatican preferissia retenir la paraula de "meditacion" o de "preièra intima". En tot cas, lo gèste foguèc ressentit coma un apasiment après los prepauses de setembre darrier a Ratisbòna e los responsables religioses musulmans declarèron : « Son gèste de preièra dins la Mosquea Blava es mai fòrt que d'excusas. » Lo govern turc es satisfach que la vesita se sieie ben debanaa. La vengüa de Beneset lo Segen refortissèc los liames ecumeniques quora los rescontres amb los chaps religioses de las autras gleisas crestianas, especialament amb lo patriarcha ortodòxe Bartolomea lo Premier. A deman.

---

ACTU Setmana dau dimarç, lo 12 de decembre au diluns, lo 18 de decembre de 2006

4 Dimarç, lo 12 de decembre de 2006. E bonjorn ! 3 a 5 ans de preson per los bota-fuec de Savòia n'auta. Lo procès que li disian "procès de las mosqueas" se debanèc la setmana passaa a las assisas de Savòia n'auta. Lo 5 de març de 2 004, una sala de preièra foguèc seriosament degalhaa a Seynod. A la mosquea d'Annecy, los daumatges foguèron mens importants. Las victimas reclamavan 200 mila euros de daumatges. Compareissian quatre òmes joves qu'avian incendiats los luecs de culte musulmans amb petròli. La pèna la mai n'auta foguèc infligia a Michel Guégan, 25 ans, comdemnat a cinc ans de preson. Èra l'ideològue dau grope. Nicolas Paz, oligan de 29 ans, e Anthony Salvino, militari de 24 ans, foguèron condemnats a cinc ans de preson mas assortits respectivament d'un e dos ans de sosta. Lo quatren acusat, Damien Gallaud, 26 ans, s'aquitarè de tres annaas d'empresonament amb dos ans de sosta. Marc Dufour, l'avocat de Nicolas Paz estimèc : « la juraa, en presa amb la realitat dau quotidian, prenguèc la mesura bòna ». A deman.

4 Dimècres, lo 13 de decembre de 2006. E bonjorn ! L'animator de television e escrivan Pascal Sevran es acusat d'eugenisme. Escrivèc dins son libre « Lo privilègi de las jonquilhas », pareissut en janvier darrier, una frasa que se pòt qualifiar de racista : « Lo viet dels negres es responsable de la famina d'Africa ». Interrotjat dins lo quotidian "Var Matin" dau 2 de decembre, persitèc e signèc en apondent prepauses racistes a sos escriches. Mantunes rampèus per lo privar d'antèna sus la television publica arribèron acompanhats d'un despaus de planh. L'associacion de Premsa Panafricana mandèc una peticion sus Interret qu'afirmava simplament : « Pascal Sevran dèu estre sanccionat ». Lo Collectiu DOM, qu'achampa Antilheses, Reünioneses, Guianeses e Maoreses, anoncièc lo despaus d'un planh denonciant prepauses racistas e eugenistes de l'escrivan-animator. A deman.

4 Dijòus, lo 14 de decembre de 2006. E bonjorn ! França foguèc escobaa per la tempèsta divèndres passat. Mesme se, segon meteorologas, avia ren de vèire amb aquela de 1999, faguèc totun un mòrt. Dins la capitala, un òme d'un cincantenau d'ans foguèc tuat e doas autras personas nafraas per la cabussaa d'un panèu publicitari sus lo boloard d'Estrasborg. La vitessa dau vent arribava a 120-130 quilometres dins l'ora. Nòu personas encara foguèron nafraas mai leugierament, especialament per cabussaas d'estatgieras e d'un aubre sus un veïcule. Sus la còsta atlantica, lo vent bofèc a 148 quilomètres per ora au "fare de las balenas" dins Iscla de Ré e foguèc mesurat a 144 quilometres per ora a "la Poncha de Chemoulin" dins Lèira atlantica. Dins Ròse, los pompiers intervenguèron mai de 200 viatges e la cabussaa d'un aubre sus tres veïcules faguèc dos nafrats, un grevament. A deman.

4 Divèndres, lo 15 de decembre de 2006. E bonjorn ! Après la mòrt de dos joves, Zyed e Bouna, dins un transformator EDF de Clichy-sota-Bòsc, en banlèga parisenca, lo 27 d'octòbre de 2005, pareissèc dins la premsa un rapòrt de l'Inspeccion Generala dels Servicis, la polícia de las polícias. Acusava los policiers de "leugieretat". Divèndres passat, fach rarissime, Eric Meillan, lo baile de l'I.G.S., donèc una conferéncia de premsa, s'esforçant de dedoanar los policiers. Afirmèc qu'après l'enquista disciplinària degun mancament foguèc establit de la part de la polícia. Estimèc perèu dever prepausar sanccions a prepaus de degun foncionari, esperant la fin de l'instruccion judiciària. Lo patron de la polícia de las policias dissèc encara que la publicacion dins la premsa, après las fugias, d'aqueste rapòrt, rebate pas veraiament lo contengut e crénhe que « la veritat sieie presa en ostatge d'un biais parcelari ». Bòna dimenchaa... A diluns que ven.

4 Diluns, lo 18 de decembre de 2006. E bonjorn ! Aquitània confirma sa politica per l'occitan. Lo Conselh regionau d'Aquitània confirma que s'engatjarè per la lenga occitana. Eira, après lo vòte unanime sus lo principi, chau que lo budgete sieie au nivèu de l'engatjament verbau. Fai un an, lo president de la region Alan Rousset anoncièc la politica lingüistica que comptava menar. Lo Conselh Economique e Sociau Regionau rendèc un rapòrt que prepausava dralhas claras. Renat Ricarrère, elegit encharjat de las lengas au Conselh regionau, saluèc dins son rapòrt lo trabalh fach per lo monde associatiu e culturau despiei trenta ans, dins una situacion d'indiferéncia de las institucions. Expliquèc que partiràn pas de rèn per montar la politica lingüistica. Los elegits basques sostenguèron fòrça aquela politica en favor de l'occitan. Sembla que i aurè una aumentacion consequenta dau budgete per la mesa en plaça d'una politica audaciosa. A deman.

---

ACTU Setmana dau dimarç, lo 19 de decembre au diluns, lo 25 de decembre de 2006

4 Dimarç, lo 19 de decembre de 2006. E bonjorn ! Dimenche, lo 10 de decembre de 2006, se morrissèc a l'atge de nonanta-un ans, lo dictator chilian Augusto Pinochet. Isabèla Allende, la filha de l'ancian president chilian desvirat per Pinochet, regretèc que "justícia aii pas pogut achabar son òbra" amb la mòrt de l'ancian dictator, mas salua "una miea victòria". "Penso als gents de Chile que patissèron, que se morissèron alora, penso au mieu paire, ben segur", declarèc Isabèla Allende. L'escrivana sotalinhèc que lo generau Pinochet "aguèc jamai las valors de s'acarar a justícia, de dire la veritat, de reconéisser las sieunas errors per sos crimes òrres". En Espanha, los partits politiques de drecha tant coma de senèca sotalinhan que Pinochet es mòrt impunit, lo qualifiant mesme de "dictator sanguinari que sarè pas regretat". A deman.

4 Dimècres, lo 20 de decembre de 2006. E bonjorn ! Los (v')uechanta ans de Castrò se debanèron sensa Castrò. Lo baile Massimo apareissèc pas dissande a la dubertura d'un passa-charriera en son onor a L'avana. Convalescent despiei mai de quatre meses, lo president cuban es plus ges apareissut en public despiei lo 26 de julhet. Degun papier, video nimai, per justifiar aquesta abséncia. I a quatre meses, subissèc una intervencion chirurgicala lorda que lo menèc a laissar lo poer au sieu fraire Raol. President per interime e perèu ministre de la defensa, Raol Castrò donèc lo despart d'un desfilat militari de doas oras, organizat perèu per lo cincantenari de l'entamenament per Fidel Castrò de la guerrilha que lo menèc au poer. A deman.

4 Dijòus, lo 21 de decembre de 2006. E bonjorn ! Divèndres passat, a Lion, se debanèc lo forom de pre-campanha de l'U.M.P. La batalha entre Micolau Sarkosy e Michèla Alliot-Marie se consumèc, fin finala ! Un milierat de personas participèron a (n')aqueste forom, au palais dels congrèsses de Lion. La passa d'armas entre lo solet candidat declarat a la presidenciala e aquela que laissa encara planar lo dobte sus sa decision foguèc benvengüa. Lo debate aguèc pas luèc lo sande 9 de decembre a París per lo premier forom, qualifiat de copia palle de las primàrias socialistas. Animat per Joan-Pèire Raffarin, reire chap-ministre, lo debate provesissèc eschambis animats, sobretot sus las institucions e Euròpa. M.A.M. deuria anonciar sa decision de se presentar o non a l'investitura de l'U.M.P. quora lo tresen e darrier forom de pre-campanha que se vai debanar encuèi, 21 de decembre, a Bordèu. A deman.

4 Divèndres, lo 22 de decembre de 2006. E bonjorn ! La risca de guèrra civila es fòrta en Palestina que Hamas e Fatah son a cotèus tirats de longa e que la situacion s'enverina un pauc mai chasque jorn. Divèndres passat, lo carrech dau chap-ministre islamiste, Ismaïl Haniyeh, foguèc objècte de tirs que faguèron un mòrt e vint-e-set nafrats dels quaus lo quite fiu d'Haniyeh. Òmes dau Hamas e dau Fatah eschambièron còps de fuec e s'acarèron a Gaza e Ramallah en Cisjordania. Desenas de mila de simpatisaires dau Hamas participèron a un achampament mostre organizat dins un estadi per festear lo detz-e-noven anniversari de la creacion dau movement islamiste. Lo chap dau grope parlementari dau Hamas, Khalil Al-Hayya, avertissèc que Hamas s'opausaria a la tengüa d'un referendom o d'eleccions anticipaas dins territòris palestinians. Bòna dimenchaa... A diluns que ven.

4 Diluns, lo 25 de decembre de 2006. E bonjorn ! Bòn Nové e bònas chalendas en totes ! A l'assemblaa nacionala, foguèc question dimècres, lo 13 de decembre, de las lengas e culturas dichas "regionalas". Un amendament a l'article II de la constitucion foguèc despausat per lo deputat U.M.P. Marc Le Fur que prepausava d'apondre après "lo francés es la lenga de la Republica" la formula "dins lo respècte de las lengas regionalas que fan partia dau nòstre patrimòni". Lo debate foguèc coma de costuma l'ocasion per los mai centralistes jacobins de repepiar las crenhenças escuòlaas de "balcanizacion" de França, d'achabament de la sacro-santa indevisibilitat de la Republica, d'atenhença a l'integritat dau territòri... Mas, per lo premier viatge, que fai mai d'un còp que la question es sotalevaa a l'assemblaa, la resulta dau vòte, mesme s'es negativa, mostra una aumentacion fòrta en favor de l'amendament que los "per" obtenguèron 44 votacions e los "contra" 57. Siam pas passat luenc. Assaiarem encara. A deman.

---

ACTU Setmana dau dimarç, lo 26 de decembre au diluns, lo 2 de janvier de 2006

4 Dimarç, lo 26 de decembre de 2006. E bonjorn ! Vos soeto d'aguer passat un Nové joiós ! Bònas chalendas en totes ! A l'assemblaa nacionala, foguèc question dimècres, lo 13 de decembre, de las lengas e culturas dichas "regionalas". Un amendament a l'article II de la constitucion foguèc despausat per lo deputat U.M.P. Marc Le Fur que prepausava d'apondre après "lo francés es la lenga de la Republica" la formula "dins lo respècte de las lengas regionalas que fan partia dau nòstre patrimòni". Lo debate foguèc coma de costuma l'ocasion per los mai centralistes jacobins de repepiar las crenhenças escuòlaas de "balcanizacion" de França, d'achabament de la sacro-santa indevisibilitat de la Republica, d'atenhença a l'integritat dau territòri... Mas, per lo premier viatge, que fai mai d'un còp que la question es sotalevaa a l'assemblaa, la resulta dau vòte, mesme s'es negativa, mostra una aumentacion fòrta en favor de l'amendament que los "per" obtenguèron 44 votacions e los "contra" 57. Siam pas passat luenc. Assaiarem encara. A deman.

Dimècres, lo 27 de decembre de 2 006. E bonjorn ! Audicion maraton dijòus passat per lo chap ministre Domergue De Villepin. Auvit simplament coma testimòni dins l'afaire "Clearstream", restèc detz-e-set oras dins lo gabinet dels jutges Joan-Maria d'Huy e Enric Pons. Aquelos lo volian auvir per esclarzir mai d'un ponch sus aquèu dorsier sorn de listings trucats e de denonciacions calomniosas. La venda de fregatas a Taiwan saria estaa l'ocasion per quauques uns de recebre fons ocultes. Las listas modifiaas foguèron las rasons de la mesa en examen dau reire vice-president d'EADS Joan-Loís Gergorin e d'Imad Lahoud, ancian quadre dau grope d'aeronautica e de defensa. Son sopçonats totes dos per fausses, usatge de fausses e denonciacion calomniosa. Sauprem belèu jamai se n'i a que se'n betèron plen las pòchas dins aquèu merchat sucós. A deman.

Dijòus, lo 28 de decembre de 2 006. E bonjorn ! Desastre per l'antiliberalisme. Bové, Besancenot, Buffet e los autres capitèron pas de se metre d'acòrd sus una candidatura comuna. Coma a chasque còp, los interestes particulars dels uns e dels autres prenguèron lo pas sus l'interest generau dau "pòple de senèca". Maria-Jòrgia Buffet foguèc plebiscitaa per son partit que la designèc dins l'escrutin interne au PC amb (v')uechanta-un dels cent de las votz. Anoncièc oficialament sa candidatura tre divèndres de sera au jornau televistat de (v')uech oras sus TF1. Clementina Autain, elegia joventa, afirmèc dijòus passat : « Es un còp dur portat a la dinamica unitària ». Acusèc lo Partit Comunista Francés de portar "la responsabilitat istorica d'aquesta reviraa". Lo front antiliberau es ben espetat, eira, e los espers dels obriers e dels trabalhaires-trabalhairitz tant parier... que se creièron de longa que l'unitat èra possibla e que se capitaria la candidatura unenca per l'eleccion presidenciala. A deman.

Divèndres, lo 29 de decembre de 2 006. E bonjorn ! Violéncias escolaras. Lo jove Carl, 12 ans, foguèc tuat non pas per estre estat matrassat per dos autres joves, mas per lo tuert emocionau provocat per la garrolha e sa fragilitat cardiaca. S'èra jamai descuberta sa malautia qu'es l'encausa de sa mòrt. L'autopsia revelèc dijòus una mauformacion cardiaca grèva amb una artèra coronariana "tant larja coma un piu" segon l'expression dels metges legistes. Aqueste drama pòt pas escondre la manca de meians crianta que la supression de miliers de survelhants entraïnèc problèmas greus de seguretat dins mai d'un establiment segondari. Lo ministre de l'educacion, Gèli de Robien, se dissèc "indignat de la recuperacion politica" dau drama e Segolena Royal prepausèc de "betre dos ensenhaires dins las classas quora sarè necessari". Se tornem trobar dimarç, lo 2 de janvier per la premiera cronica de 2007. Bònas chalendas e bon bot d'an 2006. A l'an que ven ! Se siam pas mai... que sieiem pas mench !

Dimarç, lo 2 de janvier de 2 007. E bonjorn ! E bon an ! Vos diso pas lo restant... que siam a la radiò e que me chau tenir dins las limitas de la correccion ! Kouchner vira a drecha. Marcat au partit socialista, l'ancian ministre de la santat Bernat Kouchner se dis favorable a un govern d'union nacionala. Per despassar los clivatges costumiers, se dis mesme leste a participar au govern se Micolau Sarkosy es elegit. Segon èu, la campanha menaa per los socialistas es pas la bòna que mescla "ideas bònas e fòrça arcaïsmes". Aponde que "chaudria plus ges mentir a (n')aquelos que patisson". S'es pas lo premier de virar la vèsta coma aquò, me fai totjorn pèna que quauqu'un que me semblava intelligent s'engani dins una dralha tant marria. Belèu que Sarkosy li faguèc la promessa d'un pòrtafuelha interessant. A deman.


Michèu Prat