Es ambé bòr de poesia e d’esmogua que dos comedians de tria : Ives Durand e Gèli Buonomo de la compania La Rampa –Teatre Interegionau Occitan an evocat lo lop per quauques 2600 escolans des Aups de Provença Auta dau 26 de març au 6 d’abriu de 2007.
La tropa barrutlèt dins tot lo despartament per mostrar aquela polida creacion en occitan a 28 classas de l’escòla primaria e dau colègi ; 16 representacions dau « Lop »se fagueron aquest’an a Forcauquier, Orason, Vilanòva, La Mota dau Caire, Sisteron, Riez, Sant Miquèu de l’Oservatòri, lo Brusquet, Annòt, Dinha dei Banhs, Montclar, Barcilona, Volona e Castèu Arnos.

Lo biais de juar, la presencia sus scèna, la vòia e l’estrambòrd des comedians menèt lo public dins un monde de sensacions, a travèrs los temps e los luòcs que la presencia dau lop faguèt naisser paurs, passions, legendas, curiositat, presa de consciença de la plaça de l’òme dins la natura…Lo decòr a promièra vista simple, laissèt puei descubrir de belas suspresas tant coma lo paisatge musicau.

Los ensenhaires avian travalhat avans ambé sei classas per apprendre les chansons, per se documentar sus la bestia , per legir de contes .. ; e la lenga d’oc, presenta tot dau long, fuguèt pas una empacha a la comprenença , juèt son ròtle de lenga de communicacion e de creacion aluenchada de l’imatge passeista que d’unes li donon. Lo Consèu Generau, les comunas ,la Region Provença-Aups Còsta d’Azur, lo TIO La Rampa e Animation Scolaire d’Oc, l’associacion organisatriça capitèron una bela accion per le sensibilisacion a la lenga e la reconoissença de la diversitat . Aquela capitada monstrèt la volontat des escolans, des ensenhaires, des familhas per aqueste patrimòni e la necessitat de sa presa en compte a chasque nivèu de la vita de nòstra region e especialament a l’escòla.