RAPORT MORAU 2006/2007

Estent la data de nòstra AG, aqueste rapòrt morau concerna una perioda un pauc mai granda que de costuma prenent l’an 2006 dins son entier e lo prumier trimestre de 2007

Après Carcassona fai dos ans, se retroberiam nombroses per autra manifestacion encar mai granda lo 171 de març de 2007.
Capiteriam aqueste còp d’organizar un viatge en car amb lo monde de nòstrei dos despartaments deis Aups de Provença e deis Aups Nautas.

Un còp de mai aquesta diguèt clarament qu’existiam e que voliam una lenga digna e reconeissua ; e que lo diguèt dins lo sens de l’avenir e dau dinamisme per lo nombre, per lei joines qu’èran present e per la vòlha de totes.
Per l’IEO 04/05, per nosautres totes, fuguèt un moment fòrt. Fugueriam uroses de se comptar e de se sentir nombroses a faire viure nòstra lenga e nòtra cultura occitanas.

La situacion sus nòstrei dos despartaments a de punts fòrts e de punts mai flaques.
Dins leis Aups de Provença, la presa en còmpte de la lenga e de la cultura occitana es mai avançaa (ensenhament, teatre, CEL). Dimpièi avura quasi dètz ans lo Consèu Generau 04 sosten una iniciacion a la lenga dins l’ensenhament primari.
Dins leis Aups Nautas, lo Consèu Generau contunha una reflexion entorn de la lenga e sembla aguer idèa de s’engatjar, au mens, vers l’ensenhament. Lo damagi es que lo budjècte previst per 2007 es pas estat empleat, fauta de projèctes.

Un cors de lenga a Dinha, un autre a Gap, benlèu un o dos de mai que sabo pas, aquò es pas pron e aquò mòstra que çò qu’avem a ofrir es pauc.
Un cors de lenga, per ieu, es un endrech onte de monde novèu s’assabentan de sa lenga, onte d’interessat venon mai o mens militant. Aquesta manca de cors es un constat que devem despassar.
Prumiera escasensa sarè l’estagi d’occitan aupenc que prepausam dins un pauc mai d’un mes a Gap.
Esperam de nos trobar nombroses, de vos i trobar vos e tan d’autres.


Dins totei nòstreis accions nos fau provar de faire entendre e comprendre leis enjuecs de nòstra identitat ; la vita de l’I.E.O. 04/05 tan coma l’avenir de la lenga e de la cultura occitanas passarè per aquí.