| Lei gavòts a Carcassona
De ser, lo 21 d'octobre de 2005, mon fiu Maime me ditz: Poio anar ambe tu a Carcassona, deman? Òc da! Segur mon bèu!
Agantarem lo carri de l'Espaci Occitan (IEO 04-05) a Peiruis, a 6 oras e mieja. Lei gapians, elei ,son en rota despuei una ora.
| Fai pa'ncar jorn les parpelas son pas completament desplegadas. |
Me farai un pauc de marrit sang, siam pas pron nombrós. E se l'afaire chicava? E manja lo quitran, lo carri, mentre que mastego aquela chaucha-vielha e que sabo plus coma m'assetar que lei gautas de sota me pruson e l'esquina crida seba.
Mai vaquí l'arribada, despleguèm se, puei lei bandieras. Peguèm se l'etiqueta "ÒC" en roge e jaune e dau!
A l'asard Bautesard! Fasem lèu deman serà tròp tard!
|  |
Aqui lo cor s'espompís de veire tot aquelei bandieras portairitz de la crotz pariera des armas de Forcauquier, la capitala d'Auta Provença! L'aire zonzona de lenga d'Òc! De minòts de'n pertot, a passar coma d'ulhaus, a rire e jogar, mascarats de jaune e roge; de musica a chasque canton de la plaça, sublets, bohas gasconas amb carlamusas de totas mena, sonalhas d'aver menan
trin dau tron de Dieu. Ne'n volem estre! Se recampem au mitan e vague lo rigaudon des Aups!
| Rigaudon sus la plaça | Venguet l'ora dau passa carrièra, ne'n voles de bandieras? Ne'n vaquí! Bretons, Corses, Catalans, Bascós, Berbers, occitans d'Italia, mesme francés an aussat les colors. Sembla un vou de parpalhons, o pusleu un eissame gigant escapat dau brusc occitan que vonvonejassa. E quant de rires sus lei bocas d'aquelei jovenetas que vanegan de drecha e de gaucha, e qunta esmoguda quand un vielh dau canton nos arrapa ais braç per nos felicitar.
| En rota per lo passa-carrièra | 
| E qunta vergonha per ieu quand, per un marrit reflexe, parlo frances a un policier e que me respond en Òc! Pasmens parlero Gavòt tota la jornada, a de Lengadocians, de Lemosins, de Rodanencs, de Gascons e ne'n tirero un fòrt sentit d'unitat. A la fin, eriam romputs, mai nos restava pron de vam per cantar de long dau tornar.
 | Lo caganis des Aupencs tendra sa bandiera pus aut que mai d'un.
|
Ara, a tot moment que rescòntro lo regard de mon fiu, levem lo ponh e cridem, ensems, "Anèm! Òc! Per la Lenga Occitana,Òc! "
Jòrgi Camani - I.E.O. 04-05
Lo collectiu "Manifestar per l’occitan" qu'appela a la manifestacion es formaa de l’Institut d’Estudis Occitans ; La FELCO ; la confederacion des Calandretas ; Oc-Bi ; le Conselh de la Juventut d’Oc. Entre-senhas: http://www.manifestarperloccitan.com
Data de creacion : 01/11/2005 - 01:26
Darriera modifiacion : 27/11/2005 - 19:16
Categoria : Divers
Pagina legia 6143 fes
 Davant-veire la pagina
 Imprimir la pagina
|
![[fr]](inc/lang/fr.gif)
![[oc]](inc/lang/oc.gif)
Presentacion
Presentacion
visitaires
Reaccions a n'aquel article
31 membres
Aut