Portulan - itinerari en Orient - Roland Pécoud

Portulan - Itinerari en Orient - Roland Pecout

La barrutla : una jòga existenciala, l’aventura d’una quista… Portulan I, aquò’s l’encontre apassionat d’un Occidental amb l’Autre, l’Afganistan rufe, amb sa sensualitat, lo rafinament despolhat de sos pòbles e de sos desèrts. Portulan II, dempuèi la misèria e los enebriaments de las Índias, de la man d’ailà de las  seguretats e de las aparéncias, seguís los camins dels Imalaias, cap a Ladakh, lo Tibet occidentau.

Los dos libres, pareguts en 1978 e 1980, testimònian d’una temporada pivelaira, a l’encòp present viscut e durada longa de las civilizacions. Aquesta edicion los recampa. Revista per l’autor, es seguida d’un pòstfàci amb las criticas que saludèron aquela votz inausida dins las letras d’òc.

Portulan - Itinerari en Orient raconte de viatge en dos volums de Roland Pécout. Aqueles dos libres pareguts en 1978 e 1980 racontan los viatges de l’autor en Afganistan pel primièr, en 1971 e 1974, e de delà, cap a Índia e lo Nepal pel segond qualques annadas pus tard. Una novèla edicion, revista per l’autor, dels dos obratges en un sol volum a vist lo jorn en 2013 a las edicions Vent Terral. Luènh del jornal de bòrd o de la cronica, mai pròche de la pròsa poetica, nos i fa descobrir los païsatges, los rencontres, los caminaments...

« Tu e mai elei, voudriatz ben escambiar l’espitalitat de la rota. Una estrategia complicada debana sei rusas per triomfar dei leis de la retenença e de la discrecion. D’unei s’avesinan un pauc, te fan la saludada ambé la man sus lo còr. Tu, parièr, e senhalas lo fuòc coma ton tibanèu. Per un còp, siás tu lo convidaire. An l’excusa de t’adurre un melon, as l’excusa de li ofrir l’èrba ont siás estalat, melhora que l’ermàs ont an laissat la maquina. Un melon es lèu retalhat. Denegas, que siás convidaire, e prepausas un peis a mitat crus encara sus lo magre dau fuòc. Son detz que s’esparpalhan per lei còlas, e lèu fach venon sabentament crosar sus lo fogau de morcèus de lenha blanca, acampada aquí ont cresiás que creissiá ren que la pèira. Alara s’engimbra la fèsta sembla-simpla dau partatge. »

Edicions Vent Terral.

L'autor:

Roland Pecout, escriveire viatjaire au dintre dau mond coma au dintre de l’escritura, en occitan e en francés, a pas quitat, dempuèi leis espetaments de 68, de boscar dralhas nòvas en poesia e en pròsa, dins lo jornalisme e la realizacion d’imatges.