Pilula roja - Felip Biu

Pilula roja - Felip Biu

"Adonc, ja qu'avosse contribuit - o lhèu per'mor qu'avè contribuit - per las soas recèrcas a desvolopar la teoria de la gravitacion quantica d'anèths, presentada mei anar mei com ua rivau seriosa a la teoria de las còrdas entà unificar la relativitat generau e los concèptes de fisica quantica, Matthew qu'avè sentit, aubirat o comprés - ne sèi pas quau mot e convien lo mei - que las duas teorias, especulativas au delà, ne podèn pas miar enlòc.
E la consciéncia aguda, dolorosa, d'aquera mauescaduda de l'esperit uman que'u deishè, ad eth qui avè dedicat la soa joena vita a descobrir los secrets de la matèria, com anequelit".

E si precisament e valè mei non pas saber çò qui s'escon darrèr l'aparéncia de las causas ? Non seré pas mei avisat de refusar de préner la pilula roja quan nse'n hèn l'auhèrta ? A cadun de s'ac véder. Ua causa qu'ei segura : qu'ei un anar shens tornar.


Felip Biu cauma pas : un an aprèp un primièr recuèlh de novèlas, lo segond arriba. Se la dralha es totjorn fantastica/sciéncia-ficcion/anticipacion dins las pesadas de mèstres del genre, d’Asimov a Lovecraft, lo talent de l’autor per aquesta literatura de genre s’espandís dins los marges. Pren clarament plaser a destimborlar lo lector, a li far paur, a lo far rire tanben, abans de nos susprene a la darrièra linha. Un còp acabada la darrièra novèla, que dona son nom al recuèlh, una autra casuda nos espèra, quand nos rendèm compte que Felip Biu, per son mestritge del ritme e de la mesa en scèna, per sa lenga trabalhada per semblar simpla, essenciala, es vengut un incontornable del fantastic occitan. E amb 2 recuèlhs de bon legir e a prètz modèst i a pas de rason d’i pas càser !

Per Noste edicions.

L'autor:

Felip Biu (1973) qu’ensenha l’occitan a l’Univestitat de Pau.
Qu’a publicat en çò de las edicions Letras d’òc – Camins duas traduccions d’òbras literàrias de lenga anglesa :
– Lo qui marmusava dens l’escuranha, revirat de l’anglés The Whisperer in Darkness de H.-P. Lovecraft.
– 1984, famós roman de George Orwell.

E a las edicions Per Noste: Pilula roja, Quaranta tres, Lo diable la se creme.