Lou Pichot Tresor

En 1878, Frederi MISTRAL publicavo soun Trésor du Félibrige « dictionnaire provençal-français embrassant les

divers dialectes de la langue moderne ». Aquel oubrage mounumentau fai encaro l’empèri vuei e demoro, belèu trespassable, mai jamai trespassa fin qu’aro.

En 1906, Savié de FOURVIÈRES, en vesènt que l’obro, encauso de soun drudige, adounc de soun voulume, èro pas à la pourtado de tóuti li cacho-maio, mai que mai d’aquelo di mai moudèste, li « pastre e gènt de mas », « li pastre e li marin » coume disié lou Mèstre, qu’èron pamens lou publi que n’en poudié lou mai faire soun proufié, n’en vouguè baia un coundensat que se pousquèsse atrouba à-n-un bon près. Fuguè lou Pichot Tresor, diciounàri bilengo prouvençau-francés mai peréu francés-prouvençau.

Aquéu soucit de s’adreissa en tóuti, au pichot pople de Prouvènço, èro un principe dins la vido tant dóu predicaire coume dóu felibre. Aquelo memo voulounta d’espandi à bèl èime la bono paraulo – se pòu pas mies dire toucant un diciounàri – e souto un fourmat à la pourtado dóu coumun, animavo tambèn l’abat Marcèu PETIT que n’avié fach uno publicacioun que faguè flòri que noun sai.

Vuei, vitimo justamen d’aquéu sucès, l’oubrage se trovo plus, dóu mens à-n-un près counvenènt. Vaqui perqué lis Edicioun dóu C.R.E.D.D’O, eiretiero mouralo dis edicioun C.P.M, an vougu persegui aquelo tradicioun d’uno edicioun poupulàri que s’adrèisso is estudiant, à tóuti li curious de nosto lengo, au mai poussible de nòsti counciéutadan, Prouvençau de longo toco o nouvèu vengu encò nostre qu’an coumprés que la verita d’aqueste païs caup dins si mot, dins sa lengo.

Adounc, vaqui un nouvèu Pichot Tresor, farda de nòu, mai que permetra, coume si davancié, uno intrado mai eisado dins « nosto rebello lengo d’o ».