ABCEDARI de l’embolh franco-occitan - Gerard Tautil

ABCEDARI de l’embolh franco-occitan  de Gerard Tautil. 

Quatrena de cuberta :

   De A a Z, vaquí de tèxtes asegats sus l’embolh franco-occitan que scenarizan aquel abecedari iconoclasta. Es compausat d’editoriaus sus l’actualitat e d’articles inedichs. D’Antropologias a Z coma Tanc, son prepausadas d’idèas e practicas que reguejan un terren movedís : ecologia, federalisme, girondisme/jacobinisme, istòria, Lafont, liberalisme, macronisme, migracion, Mistral, pacagonia, patrimòni, roman nacionau, terrèstre, Ucrània…

   L’autor despinta ambe sei mòts una realitat politica dessenada que patisson lei país occitans. Dau temps d’Internet, de l’imatge-rèi e dei rets « sociaus », denóncia l’apauriment d’una pensada per l’esparpalh, la sacralizacion de l’evenimenciau e l’atraccion d’unei tecnicas desaviadas au servici dei captaus e fiòlis.

   Se duerbe mai a d’analisis criticas : tant a la natura antropologica dau recit patrimoniau, sa relacion ambe lo discors sociopolitic coma lei ressòrts dau populisme, lei manifestacions actualizadas dau sobeiranisme e lei dessotas d’un neoliberalisme trionfant.

   Delà lo rompatèsta quotidian, s’esfòrça de retrobar lo sens premier dei mòts politikos, civis, aquel espaci dei relacions complexas entre poder e ciutadans. Quina reviudacion de la pensada per l’occitanisme ? Benlèu la cèrca dau grand bofe de l’istòria per èstre au còp « moviment de cultura, d’engatjament civic e politic » ? Es la tòca d’aquel ABC reborsier e calhòu, mena d’antimanuau de l’ideologia senhorejanta.

Gerard TAUTIL : Militant, autor de libres dins son rapòrt entre societat e occitanisme. Filosòf de formacion e toponimista en domeni d’òc, s’es totjorn engatjat dins d’associacions ciutadanas de terren. A revendicat mai de democracia per lei territòris e denonciat lei reformas farlatadas de la decentralizacion « neojacobina ». Bailejèt de revistas coma Occitania encuei (1980), Lo Cebier – la letra occitanista (1990-2023), collaborèt a Occitania – volèm viure al país e a d’autrei publicacions.

Lo libre es seguit d’un lexic occitan-francés 

(Extrait de la préface d’Alan Roch e de son article per Anem Occitans !)

« (…) Lo Gerard Tautil es un occitanista de la bona, un brave obrièr per qual « la fe e l’engatjament sens òbras mòrts son ». Coma per plan d’unas e d’unes, òm se pòt pausar la question de saupre se de s’interessar a maitas causas mena a l’occitanisme o se l’occitanisme mena a s’interessar a l’etimologia, a la lexicologia, al militantisme, a l’accion sociala, a las candidaturas electoralas, a la soscadissa, al jornalisme, a l’escritura… (e ne doblidi) lo tot de segur dins unas amiras umanas, istoricas e territorialas.

« (…) se trapan dins aquestas paginas los mots que fan pensar, qu’entrainan discutida, engatjament o colèras e romegadisses, los mots d’espèr e las paraulas de crenta d’autant mai que nos podèm pas acontentar de nos gaitar lo monilh e que l’anar de la planeta, la per­manéncia d’unes imperialismes politics e economics, los desreglaments climatics son tanben questions de se pau­sar aicí e ara. Atal, aqueste libre es tanben prigondament uman vist que s’apièja sus l’experiéncia, la soscadissa, pensada e perpensada, la discutida, la confrontacion en refusant d’èsser emportat dins lo flume decabestrat e incontrolable de las informacions o dins los mistèris de­sumanizats d’una intelligéncia artificiala. »

 « (…) Gérard Tautil est un occitaniste bien connu, un bon ouvrier pour qui « la foi et l’engagement sans œuvre son morts ». Comme pour beaucoup d’entre nous, se pose la question de savoir si s’intéresser à de nombreuses choses conduit à l’occitanisme ou si l’occitanisme permet de s’intéresser à l’étymologie, à la lexicologie, au militantisme, à l’action sociale, aux candidatures électorales, à la réflexion, au journalisme, à l’écriture… (et j’en oublie), le tout sans doute dans des perspectives humaines, historiques et territoriales.

(…) on trouve dans ces pages les mots qui font penser, favorisent la discussion, l’engagement, la colère et la rouspétance, mais aussi des mots d’espoir et des paroles de crainte ; d’autant plus que nous ne pouvons nous satisfaire de nombriliser et que l’évolution de la planète, la permanence de certains impérialismes politiques et économiques, les dérèglements climatiques sont en train de se poser ici et maintenant. Aussi, ce livre est-il profondément humain puisqu’il s’appuie sur l’expérience, la réflexion, la pensée et la méditation, l’échange, la confrontation, se refusant d’être emporté dans le fleuve déchaîné et incontrôlable des informations ou dans les mystères déshumanisés d’une intelligence artificielle. »

IEO-Ensages.174 p.

Julhet de 2026.

ISBN 978-2-85910-658-4