Lo Pe-ranquet del solelh - Peire Lagarda

L'estonament de las gents de Castèl-Daval foguèt grand, aquel matin de junh, quand vegèron s'arrestar sus la passejada veituras e camions cargats de soldats. Dempuèi jorns e jorns, la radiò anonçava l'espetament del front e la desbandada inesperada de las armadas francesas. Mas, lo front, pel monde dels Pirenèus, èra una paraula de comunicats, d'Estat-major. La guèra, cada ostal la coneissiá dins l'espèra d'una letra, la crenhença d'un telegrama oficial. Amagava la cara d'un mari, d'un filh, d'un fraire al mièg de totes los perilhs. Dempuèi l'escòla, las batalhas portavan lo nom d'una istòria luencha dins lo temps e dins l'espandi.