Escrivan encuei : Antoulougìo dis escrivan prouvençau de vuei – Antologia deis escrivans provençaus de uei

Escrivan encuei : Antoulougìo dis escrivan prouvençau de vuei – Antologia deis escrivans provençaus de uei

(Anthologie des écrivains provençaux contemporains)

Enfin une anthologie fournie et œcuménique de la littérature provençale contemporaine !
Écrivains provençaux du 20e siècle - Anthologies.

Éditions du CREDD'O.

Article de presse:
 Parmi les nombreux écrivains d'aujourd'hui de cette anthologie : Lisa Gròs, Bernat Giely, Patrici Gauthier, Reinat Toscano et Rotland Pecout.

Una antologia es un eisercici que d’ordinari s’òupèra pus sovènt sus l’òbra d’escrivans defuntats, pron de còups despuei de siècles, e qu’an pas chausit adonc de destriar d’esperelei un testimòni de son òbra que nin semblava lo rebat lo pus autenticament complit.
Escrivan encuei va au rebos d’aqueu biais. Quaranta cinc autors, totei vius, de tot agi e    sovènt pron joines, si son vist somondre un espaci dins aquela veirina de la producien literari contemporana pèr la Granda Provença, comprenènt tot lo territòri de la regien administrativa e sei pròchis confronts.
Lei tèstes son corts, de doas a cinc pajas, e cadun es precedat d’una notici que presènta l’escrivan, sovènt escricha pèr l’autor eu meme. Prosators e poètas si costejon, de còups que l’a dins la mema persona, lei tèmas e lei biais retraison la diversitat de la creacien de vuei dins lo terraire chausit.
L’esperit d’ecumenisme que s’espandisse de mai en mai dins lei mitans de la militanci pèr la lenga a recampat en nombre a pauc près egau, pèr lei parlars provençaus, lei tenènts de l’ortografa classica em’aquelei de l’escrich mistralenc, e entre elei de còups que li a certans pron engajats dins la lucha anti-occitanista, mai qu’an pas refusat de partajar lei memei fulhets que sei bessons eterosigòtes, selon l’urosa formula de Reinié Moucadel.  
Un miracle de mai de la valènta chorma dau CREDD’O de Graveson qu’a complit aquela òbra de tria. Coma la perfecien es pas d’aqueu monde, d’absèncis si porran pasmens regretar (Andrieu Abbe, Sarà Laurens, Matieu Poitavin, Jan-Ive Royer, o Jan Saubrement ragantat dins un apondon, e d’autrei probable), que porran èstre en resèrva pèr una segonda edicien.
Coma que vague , botem que Escrivan encuei donarà enveja a sei legèires de cavar mai d’a fons dins la vasta producien literari de lenga d’òc que la Provènça pòrge ai letras occitanas de vuei.
Article d'Alan Barthélemy-Vigouroux, publié dans Aquò d'aquì du 23 Juillet 2015.
                          

À l’ouro de vuei se trouvavo pas d’antoulougìo dis escrivan prouvençau countempouran. Lou CREDD’O que sa missioun es l’aparamen e la proumoucioun de la lengo e la literaturo nostro a releva l’escoumesso e a lou plesi de nous presenta aquelo antoulougìo que vèn de publica souto lou titre “ Escrivan encuei ”.
Dins aquel oubrage, un cinquantenau de pouèto e d’escrivan soun lou testimòni de la vido de nosto literaturo d’o dins sa diversita, diversita di gènre, diversita di tèmo, diversita dis estile.
Lou presidènt dóu CREDD’O resumis bèn tout acò dins sa prefàci :
“La literaturo s’es pas amoussado emé la despartido de Frederi Mistral e di primadié, coume d’ùni lou creson, nimai emé la generacioun di seguènt de la Reneissènço prouvençalo. Au contro, a pas decessa fins à vuei d’èstre flouradisso gràci à uno troupo aboundouso de pouèto e d’escrivan de trio. Miés ! Aro aquelo fai pas que de revendica umblamen d’èstre uno lengo regiounalo mai se pousiciouno desenant tout parié coume uno lengo dóu mounde.
Soun noumbrous ai-las li Prouvençau que counèisson pas la prouducioun literàri d’encuei e que souvènt cercon pèsqui pas de counèisse coume s’èron vergougnous de la culturo d’O, de sa culturo meiralo. Es pèr esclapa uno indiferènci e un mesprés eitant injuste que lou CREDD’O, que sa toco es l’aparamen de la nostro, a decida d’edita uno antoulougìo dis escrivan
prouvençau d’encuei. Es tambèn pèr moustra un tal enavans i decidèire pouliti.
Pèr acò, avèn pres lengo emé touti lis autour d’obro de ficioun : rouman, nouvello, pouësìo, peço de teatre. La maje part nous a respoundu favourablamen. Avèn impausa deguno normo, deguno règlo toucant lou gènre, lou parla o la grafio dis escrivan. Acò sarié esta uno perversioun de noste proujèt e uno formo de censuro countràri à la liberta de pensa e d’escriéure. Li tèste manda, ansin coume li noutiço biougrafico e bibliougrafico soun esta publica sènso ges de moudificacioun.
Uno lengo qu’a plus ges d’escrivan es uno lengo morto.
Aquest oubrage es un testimouniage de vido. Emé soun cinquantenau d’escrivan, nosto lengo testardasso resisto e tiro carnin.
Nous-àutri au CREDD’O avèn fa noste travai. À tu Prouvençau de la bono de sousteni lis aparaire de ta Lengo !
Article de Roumié Jumèu dins Prouvènço d'aro 312 (07/2015).

“ Escrivan encuei ”, li vaqui à-de-rèng : Gàudi Barsotti, Sèrgi Bec, Anìo Bergese, Steve Betti, Amanda Biot, Magali Bizot-Dargent, Jano Blacas, Felipe Blanchet, Roumié Blancon, Jan-Bernat Bouery, Jan-Frederi Brun, Jan-Ives Casanova, Marcèu Czeau, Pascau Colletta, Marìo-Cristino Coste-Rixte, Jan-Marc Courbet, Daniéu Daumas, Marc Dumas, Roulando Falleri, Patrice Gauthier, Bernat Giély, Ives Gourgaud, Alan Grinda, Lisa Gros, Jan Guèrs, Roumié Jumeau, Gibert Mancini, Gui Mathieu, Michèu Miaille, Reinié Moucadel, Tieri Offre, Miquèu Pallanca, Rouland Pecout, Roubert Perotto, Pèire Pessemesse, Jan-Marìo Rami, Andriéu Resplandin, Reinié Reybaud, Jan Saubrement, Louis Scotto, Jan-pèire Tennevin, Reinat Toscano, Flourian Vernet.