Un tren per tu tota sola - Adelina Yzac

Un tren per tu tota sola - Adelina Yzac

Una pichòta gara de campanha dins la nuèch e la nèbla. Joana, una femna envielhida, pren lo tren. Ven de daissar per la jornada Bon-Abri, l’ostal ont a passada sa vida, enrodada de qualques pròches que li fan coma una familha. Va a la vila signar un misteriós papafard que devinam que per el acceptarà de recobrar sos bens o de se’n desfar, sabèm pas tròp. Mas dins aquel tren que sembla rotlar per ela sola, lo passat torna espelir e lo viatge vira a la cachavièlha, car dins sa consciéncia angoissada, a aquel trenon bonàs se substitua un autre tren, un carreg de vagons de bestials que prenguèt amb sa maire, pendent la guèrra… Torna veire, torna viure l’absoluda orror dels còsses amolonats, de la pudesina estofanta, de las maires que pèrdon tota dignitat. Joana retomba en infèrn, arribarà pas a la vila. Quicha son mocador de drolleta, marcat d’una J. coma Joana... o Judith.

Dins aquel raconte menat d’un sol vam, sens pausas ni paragrafs, de las frasas inacabablas e repetitivas, sincopadas coma la cadéncia d’un tren, Adelina Yzac torna a sa lenga d’enfança. Contaira e poèta de las enfanças saquejadas, aicí encara nos fa sentir lo pes del malur dins una escritura que son ritme entintainant, evocant lo de las ròdas suls ralhs, luènh de tot estetisme, nos dona d’ausir una autentica poësia.

Lo tren, lo tren que se'n vai d'Enlai à d'Alai. Lo tren que punjeta e que primeja. E que se planta jol ragièr del lum, entre cingle et ribièra, dins la petita gara d'Aquí. Plantat, lo tren, plantat per una petita pausa. Lo temps que cal, tot-parièr, mai se i a gaire de monde.

Edicions Jorn.

L'autor:

Originària del Peiregòrd, Adelina Yzac es a l’encòp autora e contairitz. Per ela, la paraula occitana es primièr de tot la que li foguèt donat d’entendre dins lo vilatge de sa naissença. D’aquí son interés primordial per las dimensions oralas del lengatge, e, d’un autre costat, per l’univèrs de l’enfança.
Coma contairitz, en occitan o en francés, sas performàncias s’adreiçan mai que mai als enfants, per de dire de restablir, aquò fasent, pel biais de la lenga e de son contèxt, la trasmission del conte e dels sabers que i son ligats, a travèrs la narracion. Autora de mai d’un libre pels enfants, Adelina Yzac es tanben romancièra : a publicat mai d’un libre a las Éditions du Rouergue.