Robèrt Martí, l’òbra-vida - Josiana Daunís-Martí e Eric Fraj

Robèrt Martí, l’òbra-vida - Josiana Daunís-Martí - Eric Fraj

Las edicions de l’Institut d’Estudis Occitans (IEO-IDECO) son aürosas de vos presentar aqueste omenatge a Robèrt Martí, auta figura de l’occitanisme contemporanèu, que nos daissèt en mai de 2021.

Aqueste libre non pretend pas dire lo tot d’aquel personatge pauc comun. Cada contribucion vòl simplament parlar, a son biais, de l’òme, privat o public, e de son òbra.
Testimoniatges o analisis, los tèxtes recampats òfren totes una vision particulara, personala e subjectiva, mas çaquelà, d’un escrit a l’autre, las constàncias son evidentas, que revèlan una persona una e multipla a l’encòp: l’amorós d’un país e d’una lenga, lo passionat de transmission, l’escrivan prigond, l’autor de cançons e d’articles, de pèças umoristicas, lo pedagògue eficaç e aimat, l’òme de l’uèlh esperitós, lo militant entosiasta e infatigable, l’intellectual cultivat e dreit, de l’engatjament sense ambigüitat, lo contaire sense pariu, lo timide que pòt auçar la votz e s’expausar quand o cal, l’amic fidèl…

Al mond que contribuïguèron, aqueste omenatge s’impausèt coma una evidéncia, per dire l’astre e lo bonaür d’aver conegut En Robèrt Martí, e tot çò que li devèm. Manièra de li tornar un pauc de tot çò que nos donèt e nos dona encara.

De fòtos e d’illustracions qualitadosas acompanhan los tèxtes escrits en mai d'una lenga (occitan, catalan, espanhòl, francés) per: Claudi Alranq, Josep Arasa Ferrer, André At, Mirelha Braç, Joaquín Castillo Blanco, Bernat Cauhapè, Joan-Loís Cortial, Olivièr Daillut, Josiana Daunís-Martí, Joan-Claudi Forêt, Eric Fraj, Jacme Gaudàs, Roger Harvey, Sèrgi Javaloyès, Sèrgi Labatut, Florant Mercadièr, Danièl Rifà, Alan Roch, Estefe Ros, Joan-Claudi Sèrras, Claudi Sicre, Joan Thomàs, Muriel Vernières, Sèrgi Viaule, Joan Vilòta.

La coordinacion del libre foguèt assegurada per Josiana Daunís-Martí e Eric Fraj.

Grafisme: Elodie Saulnier (IEO OPM 2022).

Colleccion Tèrra de Cocanha, IEO edicions.

4ena de cobertura:

L’idèa d’un libre-omenatge a Robèrt nasquèt quasiment sulpic après sa despareguda, talament èran fòrts los signes de simpatia e de pena que m’èran adreiçats. Lo cap d’orquestra d’aquel trabalh de collècta de tèxtes, lo que me sostenguèt dins aquesta intencion, l’amic de totjorn: Eric Fraj, obrèt per que uèi aquel libre pareguèsse. L’Institut d’Estudis Occitans e la generositat dels donators per la placa funerària, aital coma los participants a la serada que se debanèt a l’Ostal Joan Bodon, permetèron aquesta parucion. Que ne sián aicí totes mercejats.
Aqueste libre es un testimoniatge sus la vida de Robèrt a travèrs de las personas que costejèt e dels actes que pausèt dins sa vida d’òme, d’escrivan e de contaire.
Josiana Daunís-Martí.

Rampèu d'Eric Fraj:

[...] Es un libre collectiu en omenatge a Robèrt Martí, auta figura de l'occitanisme, que nos daissèt mai d'un an fa.
Aqueste libre, que se publica a las edicions de l’Institut d’Estudis Occitans, vòl simplament dire l’òme e son òbra. Testimoniatges e analisis evòcan la riquesa de l'òme, sas facetas multiplas e sos multiples talents, la figura d'una persona fòra de çò comun…
L'omenatge s’impausèt a tota la còla coma una evidéncia, per remembrar tot çò que Robèrt nos balhèt e nos balha encara, tot çò que li devèm. Es un biais de lo mercejar e de li dire qu'amb el, fidèlament, continuarem de ganhar país...
[...] Mercé de compartir aqueste omenatge, e - malgrat la pena - la fòrça e la jòia qu'emanan d'aqueste trabalh collectiu.