Testimòni d'un temps - Francis Pouzol

Francis Pouzol – Testimòni d’un tèms

Pouèmo, letro e article e li testimòni de sis ami em'un retra - Edicioun aumentado de pouèmo escarta, varianto e coumunicacioun - Précédente édition Alès, imprimerie J. Brabo, edicioun dóu Secrèt, 1921 - Edicioun novèla : Edicioun dóu CREDD'O - 2016.

Poèmas, letras e articles e los testimònis de sos amics amb un retrach  -  Edicion aumentaa de poèmas escartats, variantas e comunicacions. Edicion precedenta Alès, estamparia J. Brabo, edicion dau Secrèt, 1921  -  Edicion novèla : Edicion dau CREDD'O - 2016

Poèmes, lettres et articles et les témoignages de ses amis avec un portrait - Édition augmentée de poèmes mis à part, variantes et communications.

Le Félibre Francis Pouzol fut tué sur le front en septembre 1918. Militant pour l’enseignement du provençal, ses œuvres avaient été publiées en 1921. Aujourd’hui paraît une nouvelle édition largement complétée avec commentaires et analyses par différents auteurs.

Ouvrage collectif - Edicions CREDDO.

Article de premsa:

Mortuorum de l’Armana prouvençau de 1919
E noste car Francés Pouzol, cabiscòu de l’Escolo di Lezert, de Vilo-Novo-d’Avignoun; encaro un jouine, valourous, plen de talènt ; èro qu’un enfant quand venguè au Felibrige, espantavo si cambarado de l’Escolo nourmalo d’istitutour de Nimes en ié legissènl d’obro prouvençalo di mèstre, e tambèn di siéuno, pièi quand fuguè mèstre d’escolo, vous pensas se marchè pèr la metodo Saviniano. Aro, après agué douna si darrié cant dins L’Ecò dóu Bouqueton, a clava si bouco tant galouiamen duberto i bèlli paraulo de pouësìo e de fe  patrialo. Sèmpre i’aura sus lou mount Andaoun, dins lou fremin di pinedo, un esperit que parlara de Pouzol.
Aquel esperit es lou C.R.E.D.D’O que vèn de l’aganta en publicant un bèu libre en soun ounour : “ Francis Pouzol, Testimòni d’un tèms ”. Acò dins l’encastre di counmemouracioun de la guerro de 1914-1918 pèr rèndre oumenage is escrivan qu’an countunia riboun-ribagno d’escriéure dins sa lengo en despié de l’abouminacioun d’aquelo tempourado.
Francés Pouzol es d’aquéli que mau-grat lou bourroulis de la guerro a pantaia arderousamen d’uno Prouvènço reneissènto. Lou C.R.E.D.D’O, em’ aquéu libre se countènto pas de reprene l’edicioun de 1921 titrado “Francis Pouzol - Pouèmo - letro e article - e li testimòni de sis ami - em’un retra ”, apound de fotò inedito dóu pouèto manlevado de l’album de sa neboudo Dono Francino Michel, pièi dins lou chapitre “ Varianto e pouèmo de l’edicioun de 1921 ” recampo de pouèmo glena dins li diferènti revisto que Francés Pouzol ié coulabouravo e relèvo tambèn li varianto d’ùni d’aquéli pouèmo d’uno publicacioun l’autro. Acò bono-di Dàvi Streight que n’a fa li recerco pèr baia si noto d’esplico dins lou chapitre  “ Entrouducioun à la vido de Francis Pouzol ”.
Dàvi Streight a passa trento an coume proufessour e sicoulogue escoulàri dins li licèu de Portland en Ouregoun, es aro cercaire e counsultant pèr l’assouciacioun Grap the Torch de Bouston. Afouga de literaturo prouvençalo es l’autour e lou tradutour de Teodor Aubanel en anglés :“ Sensual Poetry and the Provençal Church ” ( Edicioun dóu Gregau, 1996 ).
Mai es d’uno vièio amista emé Brunoun Eyrier, lou Felibre dóu Rose, que, coume Pouzol, a passa touto sa vido à Vilo d’Avignoun que faguè de counèisse lou pouèto Vilo-Nouven à Dàvi Streight.
Soun estùdi s’acoumpagno d’un fube de letro de Francés Pouzol, que la proumiero mandado à Frederi Mistral en 1910 dis francamen coume ié venguè soun afougamen pèr la lengo:
Vous dirai pas pèr basso flatarié qu’eis dins Mirèio qu’ai atrouva en proumié aquéu rai que paure e adounlenti m’esbrihaudo lou cor.
Vole estre franc coume fau l’èstre :
Eis en legissènt B. Bonnet aquéu pacan tant pouèto qu’ai près dins si libre tant poulit e tant verai l’estrambord que ai dins lou cor, e, qu’ai douna un noum à tóuti aquèli sentimen  qu’adeja me bourrelavon e que sentiéu boulega sènso saupre ço qu’èro. E dins la prefaço de “ Vido d’enfant ” quouro veguère coume Bonnet èro vengu felibre, coume éu  leguiguère Mirèio coume éu fuguère rampli d’estrambord e d’amiracioun pèr nosto lengo maire.
De-bon verai se bandiguè d’à founs dins l’acioun d’aparamen de la lengo. Se disié Miejournau mai que felibre… Aguè pas l’ur de resta proun de tèms au païs pèr coumpli soun raive. Oubrè pamens un tèms emé lou Fraire Savinian Vilo-Nouvèn coume éu. E aguèron l’ounour de la vesito de Frederi Mistral i fèsto di Jo Flourau qu’engimbrèron à Vilo-Novo, belèu la darniero sourtido dóu mèstre avans sa mort.
Francés Pouzol èro deja pivela pèr la pouësìo, malurousamen partiguè trop lèu pèr la guerro. Abandounè pamens pas soun afougamen pèr la lengo, e se retroubè tant vite emé  d’àutri passiouna dins l’Escolo dóu Bourbadamen ounte n’en beilejè lou journalet “L’’Ecò dóu Bousquetoun”.
Dàvi Streight conto tout acò emé forço temougniage e doucumen istouri, de la tempourado d’engajamen à la tempourado de rafinamen emé la responso i questioun : Pouzol  pouèto? Pouzol Felibre?
Pèr acaba sus la novo religioun que predicavo dins soun bèu pouèmo Nouvè Rouge.
La descuberto countùnio em’un article de Marcèu Bonnet publica dins la revisto Lou Prouvençau à l’Escolo en 1969 dins la rubrico “ Nòsti davanié ” que porto lou titre “ Francés Pouzol : un ome, un mèstre ”. un Mèstre pèr l’escolo e pèr la lengo, Marcèu Bonnet n’adus aqui la bello provo.
La grando revelacioun es pamens Jan-Marìo Ramier l’aporto emé la retrascripcioun d’uno coumunicacioun qu’avié facho à Gravesoun dins l’encastre di Charradisso dóu C.R.E.D.D’O en 2014: “ Li felibre sus lou front ”. coumenço pèr baia la situacioun en 14, pèr li Miejournau à la guerro es uno causo entendudo: “Parti luen de soun petoulié, dins de païs que couneissien pas, souto de climat gaire risènt, lis ome se van lèu avisa que sa lengo es un liame fort que lis estaco à sa terro, à sa famiho.” E lou fai bèu vèire “ Sus lou front escrivon ”.
Presentado tambèn la sentido di felibre coumbatènt, counsciènt de l’estatut qu’avien gagna dins la soucieta, e de cita pèr testimòni la peço de tiatre de Batisto Bonnet “ Lou Carpan ”.
Jan-Marìo Ramier n’en vèn pièi dins soun chapitre “La figuro de Pouzol”, a moustra la singularita dóu pouèto: “I’a que Pouzol que fai dinda uno autro campano.”… “Denóuncio la  guerro en remandant d’esquino Francés e Alemand”.
L’aveni de la lengo d’oc èro un soucit autant que lou quoutidian. “E lou Felibrige countùnio sa pichoto vido, adorno si pichòti capello, fai si pichòti causo.”
Dequ’a cambia? demando encaro Jan-Marìo Ramier pèr bèn clava sus l’impourtanço d’aquéu libre “La pensado de Pouzol, pèr sa valour umanisto, pèr l’atualita de si refleissioun, pòu pas mai demoura un archiéu que quàsi res lou pòu counsulta.”
Parié coume lou redis Jan-Pèire Belmon en avans-prepaus : “Francés Pouzol de Villeneuve est l’un des grands écrivains de notre littérature. Il est temps de la redécouvrir.”
De-bon lou C.R.E.D.D’O nous adus aqui un recuei ufanous sus la vido e l’obro d’un escrivan maje de nosto literaturo.

Article publiat dins Prouvenço d'aro n°323.