666 - E avisa-te que soi pas Nostradamus - Florian VERNET

666 - E avisa-te que soi pas Nostradamus - Florian VERNET

Una ficcion "apocaliptica" (joinesse mas pas sonque...)

Martin e Julian son amics dempuèi l’enfança, gaireben fraires. Mas un drama a tresvirat la vida de Martin quand fasiá sos 11 ans : la desparicion subita e inexplicada de sos parents, cercaires reconeguts en matematicas...
En 2026, desseparats per lor mestièr – Julian es vengut scenarista e trabalha en California, mentre que Martin, demorat en França, contunha de recèrcas en matematicas – los dos amics s’escrivon regularament.
Un jorn, Martin anóncia a Julian que va desparéisser... e despareis a son torn ! A daissat a son amic doas claus USB plenas de sovenirs, de letras, de fotografias e de documents…

Pròsa per joves de 12 a 97 ans (o mai !), un roman d'anticipacion en occitan lengadocian, pas forçadament optimista, mas escrich amb tot l'engenh de Florian Vernet !

Fòto de cobèrta : Beatus a Liebana, Commentarius in Apocalypsin - p.104 / Gallica.bnf.fr
Grafisme : Elodie Saulnier, IEO OPM 2022.

IEO Erau Edicions.

L'autor:

Florian Vernet nascut a Besièrs en 1941. Longtemps ensenhaire e formator dins l’Academia de Niça, director del departament d’occitan de l’Universitat Paul Valéry de 1996 a 2006. Professor emerit. lexicològue e gramatician. Membre de l’Academia Occitana-Consistòri del Gai Saber, del CPLO e de l’Academia Aranesa.
Autor de romans policièrs (E Freud dins aquò?, My name is degun, Suça sang Connection, Ont'a passat ma Planeta, Popre ficcion, Metaf(r)iccion a Collision City), de recuèlhs de novèlas (Qualques nòvas d’endacòm mai, Miraus escurs,Vidas e engranatges, Fin de partida), de romans barròcs (J@rdin de las Delícias.com, La Nau dels Fòls, Cachavièlha psicomotritz) e de contes pels dròlles ( La Princessa Valentina e autres contes, Lo Grand secret de las bèstias, Contes a rebors).

Estrach:
"… Dins lo fichièr informatic n°3 de la Clau2 que i aguèri donc accès sonque en Julhet de 2026, titolat 666 e sostitolat E avisa-te que soi pas Nostradamus, acompanhat a guisa de comentari per un tròç de l’Apocalipsi de Joan de Patmos (Aqueste qu’a d’intelligéncia, qu’interprète lo chifra de la bèstia, es lo moment d’aver de discerniment, car es una chifra d’òme e sa chifra es 666. 13.18), Martin porgissiá d’explicas detalhadas, a còps datadas, e tanben de tièras en fòrma de bilanç tragic de totas las catastròfas que nos esperavan, sus la planeta, dins las annadas venidoiras, principalament a partir de 2036.

Coma se i aguèsse personalament assistit, coma se s’èran ja produchas !" (p. 16-17)