Trin d’espèr - Bernat Giély

Trin d’espèr - Bernat Giély

Dins “ Trin d’espèr ”, retrouban mai aqui l’esperit roumanesc, que nous racounto uno poulido istòri, d’à mita camin entre lou rouman d’aventuro e d’amour.
Es tout bounamen uno istòri cativanto vo esmouvènto fai espera ço que reservo l’aveni à si persounage.
Sian aqui dins un trin d'esperanço emé la passioun inquieto pèr un amour esperdu dins un tèms que sèmblo lou finimen di bourroulo dóu mounde.

Edicioun Prouvènço d'aro.


Article de premsa:

Em’aquéu rouman, “ Trin d’espèr ”, Bernat Giély repren sa draio imaginàri emé toujour plen d’estaco à l’aparamen de noste parla.
Retrouban mai aqui soun esperit roumanesc, es-à-dire racounta uno poulido istòri, d’à mita camin entre lou rouman d’aventuro e d’amour, l’eros afrounto d’esprovo pèr gagna lou cor de sa bello.
Es aqui mai dins la passioun amourouso, en bousco d’un amour sensuau mant un cop countraria, perdu dins de caminado asardouso en aquelo tempouro guerriero. Aquéu besoun d’amour lou despasso e doumino de-longo soun èime dins li tressimàci de sa vido aventurouso. Lou triounfle de sa voulounta sus lou destin lou sauvara dóu desespèr dins aquéu realisme istourique de la segoundo guerro moundialo.
De-bon, raconto tout bounamen uno istòri cativanto vo esmouvènto, se perd pas dins lis androuno de la literaturo engajado ounte s’escound l’indigènço de l’envencioun. Rèsto dins l’essènci memo dóu recit roumanesc que fai espera ço que reservo l’aveni à si persounage dins li pajo que seguisson.
Coume Stendhal, soun ideau dóu rouman es la verita la mai despouiado d’artifice e de counvencioun. Em’ uno soubeirano impassibleta reproudus lou mounde irrissa de milànti dificulta en tèms de guerro.
Segur a de counvicioun que laisson quàuqui cop vèire dins lou prepaus d’un persounage, aquéu noble ideau de sauva la lengo qu’escriéu. Vai, sian aqui dins un trin d’esperanço emé la passioun inquieto pèr un amour esperdu dins un tèms que sèmblo lou finimen di bourroulo dóu mounde.
Encaro un cop lou ravissamen es grand e se poudra que repeti li lausenjo facho pèr soun darnié libre “ Lou triounfle de Bèu-Caire ” coume lou faguè la revisto “ Lo Bornat dau Perigord ” : “ L’entrigo es mai aqui emé lis entravadis que s’encambon dins la grand bourroulo di batèsto esteriouro pèr ajougne l’amour courtés. Vaqui mai, un rouman remirable en lengo nostro, pivelant, delicat, soulide, soumptuous e magnifi…”
La proso prouvençalo es toujour gaiardo.

Emé Prouvènço d’aro en man, sias fourça de lou counèisse, toujour aparaire de nosto lengo, Bernat Giély a deja escri mai d’un milierat d’article e mai d’un vintenau de libre en prouvençau, toujour benevoulamen dins soun acioun militanto.
Se publico vuei emé “ Trin d’espèr ” soun nóuvième rouman.
E fau rapela que sa poulido escrituro ié vouguè de davera mant uno recoumpènso : Prèmi Petrarque, Prèmi Frederi Mistral, Prèmi Bruno Durand, Grand Prèmi literàri de Prouvènço.
Emai es esta fa Majourau dóu Felibrige e Óuficié de l’Ordre dis Art e di Letro.
Article de Tricìo Dupuy, publiat dins Prouvènço d'aro 389.