Leis Amics de Mesclum - L'armanac 2017

Leis Amics de Mesclum - L'armanac 2017

L’obratge de l’associacion Mesclum, dins la tradicion grandas dels armanacs dau XIXè sègle.

La pagina « Mesclum » dau jornau « La Marseillaise » pareis cada dijòus dempuei 1985. Se i tròban d’articles de fons, de renduts còmptes e de fotòs, de novèlas e de romans fulhetons, de dessenhs, de BD e, regularament, d’informacions variadas sus la vida culturala, politica, economica en Occitània.
Es 9 ans puei, en 1994, que s’es creada l’associacion « Leis Amics de Mesclum », la publicacion semaniera, òbra d’un militant, es ansin venguda projècte collectiu. La tòca premiera de l’associacion, fondamentalament antí-racista, es la lucha per l’egalitat vertadiera deis òmes, que passa per l’egalitat dei culturas, subretot aquelei, coma l’occitana, que son minorizadas, despresadas, coma se la valor d’una cultura se podiá mesurar en nombres, çò qu’es malastrosament un vejaire colonialista fòrça comun…

De notar que l'armanac 2018 es ara dispo aqui.

Extrach: La bata

Veniau d’intrar, d’aquesta annada escolària 62-63, en 6ena, au collègi d’ensenhament generau des Chartreux. I aviáu passat la premièra partida de mon escolaritat (levat la mairala). Era « mon » escòla, me l’i sentiáu ben, aviáu pas vougut, dau fach, la quitar per anar au licèu. Subretot, au collègi, lei libres èran donats, mentre qu’au licèu, lei faliá crompar. Mon paire trabalhava a la « Cablerie Phocéenne » e ma maire a la « Manufacture Provençale de Matières Plastiques », a la carrièra Jean Martin. Es aquí qu’èran produch les topins « Riviera », a resèrva d’aiga. Maugrat aqueu salari doble, lei finanças, au 21 dau baloard de la Blancarda, èran pas un reine de bèu temps. Era pas la catastròfa, mai faliá, coma se disiá, « far atencion »...

Jòrgi Camani.