Contes de Gaulena - Ernèst Negre

Contes de Gaulena - Ernèst Negre

Contes

Lo grand especialista de toponimia que foguèt Ernèst Negre nos tòrna metre la lenga d’òc en boca dins l’unitat de lòc e de temps del seu vilatge d’a passat temps. Un omenatge coral a totes los seus.

Edicions Vent Terral, colleccion Paratge.

L'autor:

Ernèst Angèli Serafin Negre (Gaulena, 1907-2000) qu'èra capelan e professor a la Facultat liura de Tolosa, foguèt tanben un lingüista e escrivan occitan, autor de fòrça recèrcas sus la toponimia occitana e francesa.

Ernèst Negre nasquèt dins una familha pagesa del país albigés (a Gaulena) en 1907. Obtenguèt la licéncia en letras en 1927. Lo sieu engatjament dins la vida eclesiastica (Grand Seminari de Tolosa) culminèt en 1933 quand foguèt ordonat prèstre. Foguèt puèi professor abans de presentar sa tèsi sus la toponimia del canton de Rabastens en 1959 e venir professor de filologia francesa e occitana a l'Institut Catolic de Tolosa. Foguèt un cercaire menimós e prolific. Foguèt en 1970 lo divulgador de l'òbra d'Augièr Galhard que traduguèt en francés e publiquèt (amb una traduccion) l'òbra de l'escrivan de Galhac, Matèu Bloin en 1976. Faguèt publicar lo libre de Gustau Farenc sus la flòra occitana de Tarn en 1973. En 1981, obtenguèt lo Prèmi Albèrt Dauzat. Foguèt un dels primièrs cercaires e collaboradors per l'Atlas Linguistique du Languedoc Occidental que ne menèt 23 enquèstas dins los departaments de Tarn, Avairon e Tarn e Garona. Escriguèt qualques pèças literàrias que la pus coneguda es Contes de Gaulena. Se publiquèt en 1984 un recuèlh dels articles del canonge. A sa mòrt, leguèt la siá bibliotèca e los sieus escriches al Collègi d'Occitània que n'èra estat president aprèp Josèp Salvat.