Lou papo di fournié - François Jouve

Lou papo di fournié - François Jouve

... i'avié Flourimound, de la carriero dis Avoucat, lou fresquèti de la proufessioun que, pèr se destingui de si coulègo, franchimandejavo, se vougnié lou péu emé de graisso d'ourse e croumpavo de vèsti de moussu, tóuti negre, encò di marchand d'estrasso ; i'avié peréu li dous bessoun de Ferand, li fraire enemi que, pèr se contro-ista, se fasien tóuti dous dire « Ferand l'einat ». Pèr la memo resoun, aquéu de Camp-Flouri se disié « lou rèi di pastaire » e l'autre, aquéu de la Porto-Eiguiero, « l'espaventau di pastochouio » ! E i'avié de mai lou Bèrbi, de Marsiho, l'enventàri de la courpouracioun, aquéu qu'avié trouba lou secrèt de la pasto molo, secrèt que desempièi dous siècle, en Prouvènço e en Lengadò, servié à faire li testeto de z'Ais e lou pan de Bèu-Caire ; emai encaro i'avié Misèri, de la levado dóu Rose.

Presentacion e revirada francesa de Lucette Besson.

A l'asard Bautezar !

Estrach:

Lou papo di fournié
Poudès crèire qu’uno vido pariero rendié gaire amistous lou caratère adeja proun aigre de nòsti fournié. Quand perfés, dins si ràri moumen de lesi, boutavon lou nas foro de sa carriero, à soun anamen, à sa deguèino, entre milo poudias li recounèisse. Lis un grand e espalu, lis autre chambard e rabasset, mai tóuti pale coume de cadai, caminavon tèsto souto, lou bust en avans, emé de manasso di det long, clavela d’agacin e croucu pèr li póutirado, que penjavon lourdamen au bout de si bras nervïous e nousa. Anavon en rasclant li rigolo, lis iue bèn à la sousto souto un front enrega e coume carga de soucit ; avien lou regard mourènt e tort d’un chin rougnous qu’après uno rouissado soun mèstre aurié foro-bandi.

Rejouncho de leituro:
Veici un libre qu'es pareigu lou proumié cop en 1933 e qu'es esta tourna edita is edicioun "À l'asard Bautezar!" en 2018, adounc un libre forço eisa de trouba encò li bòni librarié mounte se pòu lou coumenda. Aquesto edicioun nouvello fai aperaqui 150 pajo emé sa reviraduro en francès.
Lou libre es un vertadié rouman, un rouman istouri que se debano dins lis annado dóu regno de Benezet lou dougen, Papo d'Avignoun , adounc lou rouman se debano dins la Ciéuta-Estat que la Coumtat de Venisso n'èro pas encaro terro papalo.
Aquest Papo èro eissu d'uno famiho de fournié e Francès Jouve es tambèn fiéu, rèire-fiéu de fournié.
Pèr soun proumié rouman, se poudié pas faire mens que d'escriéure quaucarèn sus sis ourigino.
Li fournié, à n'aquesto pountannado, èron pas mai que de pelègre, mespresa pèr tóuti, óubliga de faire de pan tóuti li jour, que falié n'en trouba à touto ouro, e que li pres èron douna pèr lis autourita.
La vengudo de Benezet lou dougen, eissu d'uno famiho de fournié, permetié de douna d'espèro d'èstre uno idèio mai bèn trata i fournié d'Avignoun.
S'en van, adounc, demanda audiènci au Papo.
Aquèu d'aqui s'en va li reçaupre e ié douna resoun, mai, que i'a un mai, vai ié demanda quaucarèn en escàmbi …
Lou rouman vous dounara li coundicioun que baié lou Papo i fournié e ço que se debanara …

Critico de Yacca Bado lo 1er de setembre de 2022.