Marcovaldo o las sasons en vila - Italo Calvino (revirada occitana Miquèl Pedussaud)

Marcovaldo o las sasons en vila - Italo Calvino (revirada occitana Miquèl Pedussaud)

Recuèlh de contes revirats de l'italian a l'occitan per Miquèl Pédussaud.

Dins aqueles vint contes cortets, seguissèm Marcovaldo dins d’aventuras estonantas, plenas de fantasiá e de poesia, pintradas ambe gaubi e unmanitat per Italo Calvino.

En Itàlia, lo libre es al programa dels colègis e trobam de librariás que pòrtan lo nom d'aquel personatge atrasent, que mai d'un còp dona d'aire a Charlot.

Aquela publicacion pels joves (mas taben pels adultes) es fòrça actuala. O trobam per exemple dins una critica fina de la societat post-industriala. Las lengas italiana e occitana son pro pròchas per ensajar de servar l'èime picaresc de l'òbra del grand autor.

Vint novèlas del grand escrivan italian... e cinc annadas de la vida de Marcovaldo, manòbra eissut del campèstre qu'es obligat de s'exilar dins les grandas vilas del sègle 20 per noirir sa familha. Un personatge atrasent que sembla Charlòt, mai una felicitat vertadièra de lectura !

Un pauc Charlòt, un pauc Gaston Lagaffe, Marcovaldo es un personatge bravament atrasent. Paire d'una granda familha e manòbra, es lo rei de las combinas foirosas. Totjorn estrambordat, curiós, inventiu, visca mila vidas dins aquela granda vila italiana anonima que regorja de tresaurs per de pantassaires coma el.
Seguiretz nòstre eròi per d'aventuras imprevistas, que se'n escapa coma una gata banhada, e pas totjorn sens consequéncias.
Lo raconte se descompausa en sasons, que se deveson en capítols que se pòdon legir independentament.
De racontes rics e inventius, plens de poësia : nuèchs traversadas de tropèls de vacas, molonadas de botiòlas de sablon volatejant pel cèl, òrt escondut...
Rai, una felicitat vertadièra de lectura !

Revirada en occitan lengadocian per Miquèl Pédussaud. Per adolescents e adultes, en occitan.

llustracions: Edouard Monneau.

Edicions Edite-moi !

L’autor:

Italo Calvino. Nasquèt a Cuba en 1925 e se moriguèt a Siena en 1985. Escriveire, fabulista, scenarista de cinèma, teorician, foguèt tanben sòci de l’Oulipo, movement surrealista creat per R. Queneau.
Sas òbras mai conegudas son los contes fantastics : Il Visconte dimezzato (Le Vicomte pourfendu), Il Barone rampante (Le Baron perché) e Il Cavaliere inesistente (Le Chevalier inexistant).

L’autor-traductor:

Miquèl Pedussaud a un diplòma en relacion ambe la revirada : Master 2 LLCER (Lengas Literaturas Civilizacions Estrangièras e Regionalas), Opcion Occitan (2013).
2015 : Prèmi Romanilha (Concors « Escriure en lenga d’òc », tèxt publicat dins l’almanac « Leis Amics de Mesclum », en 2016).
2018 : Publicacion d’un primièr libre en occitan, « Brigalhs », Edicions de l’Institut d’Etudis Occitans Languedòc-Rosselhon.

Prenguèt tanben de corses d'italian, entre 2013 e 2017. Vaqui lo dins un ròtle que li conven fòrça: lo de traductor ! Lo mot que cal, la subtilitat de las lengas e lo respècte de l'èime de l'autor lo fan trefolir...

L’illustrator:

Edoard Monneau nasquèt en 1991, a Bachas, dins Cominges.
Sa premièra passion foguèt la gimnastica, coneguèt plan La fosse à cubes de Caors, lo Cheval de saut de Carcassona, las barres parallèles de Narbona, e Le trampoline d’Avinhon.
A 19 ans, segut suls bancs de l’Universitat del Miralh de Tolosa, tornèt descobrir lo gaug de dessenhar. En 2017, foguèt diplomat del Grau professional d’ilustracio a l’escola pública d’art i disseny Massana de Barcelona.

Article de premsa:

Marcovaldo o las sasons en vila d’Italo Calvino es un conte filosofic ont seguissèm, sason aprèp sason,  Marcovaldo, un manòbra vengut del campèstre que viu amb sa familha, amb pro pena, a la vila.
Las tematicas d’aqueste libre, publicat lo primièr còp en 1963, demòran plan actualas : lo nòstre eròi viròla de longa dins una lucha permanenta entre natura e cultura, entre campèstre e vila, entre tradicion e modernitat. Marcovaldo, coma filh de la natura, recèrca las valors paisanas que vei desaparéisser dins la vila industriala, mercanda, consumerista e tant alunhada de la natura. Marcovaldo es nostalgic d’una existéncia qu’es pas pus possibla dins aquela societat pòst-industriala. Malenconic, sovent encolerit e desillusionat, a n’èsser, de còps, comic e risolièr, sas aventuras demòran estonantas, plenas de fantasiá e d’umanitat.
Marcovaldo es un pauc nosautres, es nòstre miralh. Sèm el quand nos vesèm nos autofotografiar amb una vaca al salon de l’agricultura a París, triste signe d’una natura desnaturada...
L’autor nos balha un biais de reflexion sus la vida ; e quina que siá la vòstra edat, del collègi a la retirada, son imaginari vos menarà a soscar sus l’òme e la condicion umana mai generalament.
Nascut en 1923 a Cuba e defuntat en 1985 en Itàlia, Italo Calvino es un fabulista plen d’umor e un membre actiu de l’Oulipo (« Ouvroir de littérature potentielle », un grop de literatura inventiva e innovanta del sègle XX creat par Raymond Queneau).
Aquesta revirada en occitan per Miquèl Pedussaud es fidèla a la lenga rica e subtila de Calvino. Las illustracions d’Edouard Monneau pòrtan un buf de modernitat a aquela òbra literària de qualitat.
Article de Marion Laignelet, La tuta d'òc, publiat dins Lo Diari 58.