Patonet, l’orson occitan

Patonet, l’orson occitan

Dins lo cadre dau projècte bilinguisme precòç e petita enfancia (ninoèras, escòlas mairaus, mai a maison perèu), l’IEO que creè, sus lo modèl breton de Skouarnig*, un personatge identificat per la lenga occitana : Patonet.

​

L’utilizacion deu Patonet qu’es dobla, pr’amor l’orson que’s pòt utilizar com :

•     un docinon a calinar ;
•     una monaqueta que los adultes e poden manipular aisidament amb la man a l’interior (mai d’una possibilitat que’s pòt) : lo poç e lo det màger per articular las patas de davant, lo det indici per animar lo cap.
  
  

​

E qu’es partit per aventuras de las beròjas, en tot seguir los conselhs d’utilizacion.

Patonet es mai qu’un simple orson-dodon que jòga tanben la mariòta : es un assistent amistós per la transmission de l’occitan ai pichonets.
Es un personatge qu’atriva, amusant e reconfortant ; es un companh ideau per ajudar a crear un ambient positiu e de seguretat afectiva, elements indispensables per ponchonar lei pichons d’intrar dins la lenga occitana.

Qui ès, Patonet ?

Com tots los orsons, lo Patonet qu’es un bon somelhaire, que’u va de far un cluc dins un endret docet.
Qu’es l’amic deus dròlles. Qu’es un chic liròi, colhonaire, coquinòt, a bèths còps trufandèr !
Que’u platz de far gaimantons e potonets (e de’n recéber tanben).
Qu’a bon escot, qu’a imaginacion e qu’aima de condar istòrias, que l’agrada d’anar passejà’s, de viatjar. La musica e las cantas que’u convienen plan. Que’u va de s’encontrar los amics e la familha en Occitania e dins lo monde sancèr.

 

Vaquí quauquei conseus per vos ajudar a utilizar Patonet per lo mielhs:


Patonet reagís que quand li parlam en occitan !

​

- los adultes : es important de totjorn utilizar la lenga occitana quand parlatz a Patonet.

- los pichons : li fau aprendre de parlar ren qu’occitan ambé Patonet per que s’acostuman de o faire en toteis ocasions. De fach, s’un enfant parla en francés a la mariòta, fau que l’adulte tòrne dire sei paraulas en occitan per que Patonet reagisse.

Patonet, eu chuchoteja a l’aurelha de l’adulte que tòrna tanben dire sei paraulas, en occitan, a votz auta, ai pichons.

 

L’adulte pòu tanben modificar la votz quand fa parlar Patonet. Vèn an eu d’èstre atentiu a l’utilizacion de l’occitan per lei pichons, tant infima que sigue, e de la valorizar gràcias a Patonet.

 

Patonet dins la vida vidanta

 

Patonet vos pòu ajudar dins leis activitats de cada jorn, au moment dei rituaus per exemple.

Vos podètz tanben fondar sus lo Guide professionau per l’acuelh bilingüe deis enfants de 0 a 4 ans, disponible pròchi de l’IEO.

 

Identificar lei diferents moments de la jornada e i integrar Patonet lo mai possible : dins lei grèpias, dins lei escòlas mairalas, lo podètz per exemple faire intervenir amb una cançon au moment dei regropaments entre pichons, dei gostarons, dei repàs, dei penequets…

 

Patonet se passeja

 

Dins lo Guide professionau per l’acuelh bilingüe deis enfants de 0 a 4 ans, existís una activitat interessanta a realizar : « Un dodon en visita ». Aquesta ficha d’activitat explica coma faire lo liame entre lo luòc d’acuelh e l’ostau deis enfants, per l’intermediàri d’un dodon (e adonc per exemple Patonet). De notar que pòu èstre judiciós d’aver dos exemplaris de Patonet, un que demòra au luòc d’acuelh, l’autre que pòu anar encò deis enfants.

​

Vaquí un exemple d'utilizacion de Patonet ambé d’escolans, dins la classa de Marie-Françoise Lamotte a l'escòla mairala de Pueilobier (Puyloubier – 13):