Limitas - Joan Bodon - Joan-Claudi Sèrras - Bernat Bergé

Limitas - Joan Bodon - Joan-Claudi Sèrras - Bernat Bergé

Limitas, a las limitas del real, de personatges enfangats dins une vida previsibla fins al desespèr se tròban acarats a una realitat que los despassarà lèu. Imaginem un moment que l’ascensor que nos pòrta cada jorn al burèu nos mena endacòm mai, dins una autra vida, semblabla mas ont auriam pas mai de plaça. Qué far alara ? Imaginem que, coma Jòrdi, 7 ans, dins lo lièit ont nos colcam cada jorn, s’i vèja desaparèisser los orses de la tapissariá. E s’aquò arrivava vertadièrament ?
E de qué son los Dracs que ne parlavan los ancians, de menas de bèstias enòrmas, d’òmes o quicòm mai ?
S’inventan las istòrias o an totjorn existit ?

Limitas es lo primièr títol de la colleccion Joventut, dedicada als jovents qui vòlon descobrir la literatura occitana. L'estranh es a l'aunor d'aqueles sièis contes e racontes de très mèstres de la literatura occitana, supèrbament illustrats per Bernat Cauhapé.

Una seleccion de contes e novèlas fantastics : doas istòrias de drac de Joan Bodon e quatre racontes mai enrasigats dins lo monde d'auèi : e si los orses de la tapissariá venián vius ? E si l'engenh de l'escrivan vos fasiá sautar sos personatges al morre ? E si las veituras venián independentas dels òmes ? E si, de montar en ascensor, aquò vos capvirava la vida ?

Una bona introduccion per descobrir de recuèlhs mai longs, puèi qu'aqueles tèxtes son tirats dels Contes del Drac (Joan Bodon), de Masquetas e Mariòtas (Joan-Claudi Sèrras) et de L'Estilò  negre (Bernat Bergé).

Colleccion Joventut, IEO Edicions.

Los autors:

Bernard BERGÉ es professor d’occitan retirat e contaire.

Joan BODON (Jean BOUDOU en francés) (Crespin, 11/12/1920 - Argeria, 24/02/1975), es un dels grands escrivans del mond modèrne. Marcat per l’imaginari del conte, tracta dins son òbra de tèmas universals o biblics per parlar de son intimitat amb la lenga occitana que vei demesir.

Joan-Claudi SERRAS es nascut en 1944 dins Tarn. Professor de letras classicas e d’occitan, romancièr, foguèt responsable de las edicions a IEO-Ideco de 1987 a 1995.
Collaboracion a la redaccion del Lexic Elementari (IEO, 1996) e del Tot en òc (IEO, 2002).

Taula:

L’auca, de Joan Bodon.
Jòrdi e los orses, de Joan-Claudi Sèrras.
La pèl, de Joan Bodon.
La còpia, de Bernat Bergé.
Las crancas d’acièr, de Joan-Claudi Sèrras.
L’ascensor, de Bernat Bergé.