L'Oliu del giratòri, conte ecologic - Annick Jahan

L'Oliu del giratòri, conte ecologic - Annick Jahan

La narbonesa Annick Jahan a escrit un polit conte ecologic en francés "L’olivier du rond-point", un libre pels 9-12 ans mas tanplan per totes los que s’interèssan al sòrt dels olius transplantats. Lo libre es disponible tanben dins una version anglesa e, ara, dins la version occitana L’oliu del giratòri, mercé a la revirada de Mirelha Braç e Alan Roch (IEO-Aude).

En 24 paginas, dins un format carrat amb d’illustracions (dessenhs de Paul Reig e aqüarèla de Cecilia Puig), seguissèm las aventuras de Pablo (es lo pichon nom de l’oliu andalós que li arriba de parlar dins sa lenga mairala).
« M’an plantat aicí al mièg d’aquel giratòri ont milierats de veiculs de tota mena se preissan en grand tarabast, en redond, s’agís d’una ronda ? Curiosa ronda ! Sonòra, bronzinanta e que pudís… Mon exili… aqueste cercle de missanta tèrra ont los òmes vestits de jaune fluò an escampat, d’aquí entr’aquí, unis blòcs de pèira que fan mina de me protegir de las veituras calugas e retenon coma pòdon lo sòl a mas rasigas. »
I agèt lo viatge ont los olius promeses a se ganhar una copa bonsaï dins las jardinariás crosavan los camions d’avets d’Escandinavia venguts « festejar » Nadal : « Jol pretèxte del rescalfament climatic, un fum d’espècias vegetals, e de còps animalas, se tornan trapar dins unes endreits ont procuran l’exotisme recèrcat. Atal, una franja de palmièrs servís de totèm exotic al centre del jardind’una ostalariá bèla dins una província alemanda ». Los emplegats de la Comuna, amb lor malhòt jaune, (« lemons sus patas ») li fan plan de misèrias. Crenta la ventòrla e demanda a sa passatgièra clandestina, una migala, d’anar véser endacòm mai.
E aquel drollet que passa amb son amic a bicicleta, que s’arrèsta, qu’ensaca sas olivas e que vòl faire venir son papeta, un especialista de la preparacion de las olivas de taula, lo poirà salvar e lo tirar d’aquel giratòri sens èime ?

Aquel conte se ditz «ecologic» perque nos balha a soscar sul sòrt dels arbres, desrasigats, carrejats, plantats al mièg d'enlòc... Aquí, son las aventuras d’un oliu, personificat sos lo nom de Pablo, que seguissèm : un còp es lo companh de viatge d’un avet d’Escandinavia qu'acabarà coma decoracion de nadal, un autre còp ven l’òste d’una migala clandestina, o encara la victima co-laterala dels ajustaments dels servicis de las vias,... Mas aquela istòria es subretot una reflexion sus l'exili e la transmission...

Un conte per los 9-12 ans, revirada en occitan per Mirelha Braç e Alan Roch.

Edicions l'an demain.