A nòstre biais - Apprendre l'occitan Vivaro-Alpin - Gérard Ligozat

A nòstre biais - Apprendre l'occitan Vivaro-Alpin - Gérard Ligozat

Aquèu metòde tracha de l'occitan vivaro-aupenc « un espaci linguistic qu'a una bèla diversitat, que n'ai vougut rendre còmpte » dissèc l'autor a Michèu Neumuller que l'entrevistava per lo mensuau Aquò d 'Aquí. D'efiech, aquel espaci s'estende de l'Ardecha, de la Droma e de las Aups miegjornalas dinc a una quintzena de valaas piemontesas, e dau sud de l'Isera dinc a las Aups maritimas.

Edicions Yoran Embanner.

L'autor:

Naissut a Gap (Autas Aups), Gerard Ligozat a estudiat las matematicas a l'Escòla normala superiora, es vengut puei professor d'Universitat e cerchaire au CNRS en intelligéncia artificiala. Creissut dins una familha que se l'i parlava occitan, aviá passat chasque estiu coma pastre dins una ferma onte lo vivaroaupenc èra la lenga de trabalh. Engatjat despuei mai d'un trentenat d'ans dins lo movement per la defensa de las lengas regionalas, es sòci de l'Associacion internacionala d'estudis occitans (AIEO). A revirat en vivaroaupenc d'istòrias dau Pechon Nicolau publicaas en 2018 en aquò d'IMAV edicions.

Article de premsa:

D'aüra en lai l'occitan vivaroaupenc vai aguer son metòde d'aprendissatge de referéncia : A nòstre biais – Apprendre l'occitan vivaro-alpin de Gerard Ligozat, qu'es membre dau Conselh Linguistic dau Congrès.
Aquèu metòde, qu'es publicat en aquò de las edicions Yoran, tracha de l'occitan vivaroaupenc « un espaci linguistic qu'a una bèla diversitat, que n'ai vougut rendre còmpte » dissèc l'autor a Michèu Neumuller que l'entrevistava per lo mensuau Aquò d 'Aquí. D'efiech, aquel espaci s'estende de l'Ardecha, de la Droma e de las Aups miegjornalas dinc a una quintzena de valaas piemontesas, e dau sud de l'Isera dinc a las Aups maritimas.
Es un libre que sa tòca es d'èstre utile per un large public : de monde que descuerbon l'occitan, o que n'an qu'una coneissença parciala, ensenhaires qu'an besonh d'aisinas per ensenhar, e de monde que ja parlan occitan, mas que vòlon descurbir un novèu dialecte de la lenga.
Per aquò far, lo libre es fach de doas parts : una promiera part, per de començants, caup de textes que lor fan viure de situacions de la vita d'un estage d'estiu ; la segonda part, per de monde mai assabentats, es compausaa amb de textes autentics d'una granda varietat, tant per lor subjecte (enquista de terren, entreten, cònte, teatre, poesia) coma per lor parlar : chasque texte illustra un parlar particular.
Article publiat sus locongres.org (07-2020).

---

L’occitan vivaroalpenc es un dels dialèctes mens presents dins los manuals per aprene la lenga. Es per aquela rason que Gerard Ligozat publiquèt arunan lo libre A Nòstre Biais un manual per aprene lo dialècte nòrd-occitan mai oriental. Lo quite autor o nos explicava dins una entrevista:
 “Per ensenhar, se necessita de materiaus d’ensenhament. Aquò es una rason qu’ai volgut far un manuau que sos tèxtes, dins una promiera partia, pòion èstre utilizats per d’escolans joves o d’apreneires novèus, que lor chau aprene una lenga de basa per comunicar dins un ambient realista: un estagi de lenga. Per de monde que començan, lor chau una lenga sosten sens (tròp de) variantas dialectalas, e avem chausit un parlar dau departament qu’es centrau e puslèu conservator: aqueu d’Ambrunés. E los tèxtes son pas de tèxtes literaris o d’analisi, mas pòion servir per la comunicacion de basa. Per chascun, me siáu demandat: quinas estructuras fan mestier per parlar de se, de sos projèctes, partejar un repais, far la fèsta, etc.
 Es solament quora l’apreneire se pòt apiejar sus aquela basa que, dins una segonda partia, donam una idèa panoramica de la richesa e la diversitat dels parlars, amb de tèxtes qu’an un interés literari, etnografic, o istoric.”
 Los enregistraments sonòrs qu’acompanhan lo metòde se pòdon trobar sus aqueste ligam.

Article publiat lo 5 de junh de 2021 dins jornalet.com