La batesta de Lepant - Reinat Matalòt

La batesta de Lepant - Reinat Matalòt

LEPANT : toi lu Niçards conóisson de segur la carriera d’aqueu nom. Ma sàbon bessai pas totjorn embé precision cen que siguèt, au just, la batèsta de Lepant, aqueu 7 d’octòbre dau 1571, quora Niça, qu’èra alora sota lo govèrn d’Emanueu Filibèrt, Duc de Savòia, partecipèt a-n-aquela granda expedicion cristiana còntra lu Turcs.
Qu’anàvon faire lu Cristians a Lepant, a l’entrada dau Gòlfe de Corint? Perqué èra partida aquela armada à destrúger la flòta turca?
Lu Niçards, embé lu Venecians e lu Espanhòus, siguèron ben presents a-n- aqueu rescòntre ferotge, dau temps que lu Francés, elu, estaíon ben tranquillament en defoara…

Reinat MATALÒT respoande a toti li noastri interrogacions dins un estudi clar e documentat, en detalhant lu preparatius de la batalha e lo sieu debanar.

Illustracion de la cubèrta d'après Breugel e F. Huys.

Edicions "Auba Novèla".

Extrach:

Lo perilh
A la prima de 1571, esquasi tota la Mieterrana orientala era en passa de tombar en lo poder de l’emperi otoman. Grècia e l ‘Archipel èron ja sota la copa de la Poarta, Cipri (ò Quipri) venia de cabussar en seguda a la sanguenosa presa per li tropas de Selim II, filh e contunhaire de Soleiman lo Manhific. En demai, li flòtas aligadi dei Turcs e dei Barbarescs assajàvon de conquistar Creta. Abrivats per la sieu capitada, li escadras dòu Creis s’encafornàvon en Adriàtica en devastant li isolas Ioniani e la coasta dalmata fins ai poartes de Venècia.
Denant lo perilh gue s’arrambava, l’Occident crestian si decidet, per un còu, de reagir embé lo vanc dòu sieu cap, lo Papa Pio V que, gauch a la sieu testardisa, capitet lo 25 de mai de 1571 de vencir toi lu interés divergents, li rancuras e li maufidanças recipròqui per crear una santa Liga contra l’infidel en mesura de s’opausar ai estiganças dòu grand Turc. L’acordament prevehia un’ aligança ofensiva e defensiva contra lo Turc, la creacion d’una foarça permanenta de doi cents galeras, cent naus de traspoart e cinquanta mila fantassins e lo mand d’un’ espedicion anuala au Levant.