Le français parlé à Marseille et en Provence - Auguste Brun

Le français parlé à Marseille et en Provence - Auguste Brun

Proumiero edicioun en 1931 per l'Institut Historique de Provence, reedicioun en reprint en 1982 per lis Edicioun Jeanne Laffitte, pièi uno nouvello edicioun vèn d'espeli encb dis Editions des Regiounalismes. Nous pourgisson, vuei un oubrage qu'es pas vertadieramen un diciounàri, nimai uno gramatico, mai pulèu uno esplicacioun d'aqueste parla marsihés mita prouvençau, mita francés. Uno meno de guide per la lengo de Marsiho que despiéi lis annado 30 a pas proun chanja. De mot estrangié ié fuguèron apoundu, mai li vertadié Marsihés retroubaran li voucable que sousprenon toujour le vesitaire : la pile, la platane, la pièce, l'ermas, lou pecout...
Li mai saberu escrivien un francés simple e courréit, mai li noutàri mesclavon à l'asard un aussiliàri francés segui d'un participe prouvençau, uno fraso coumençado dins uno lengo que se countinuavo dins l'autro.

Demai tre la debuto deu siècle XIXen, l'abitudo de parla francés prevauguè dins lou pople. Lou parla éro pas lou meme à Touloun, à Digno, Arle o Avignon. Auguste Brun a escouta subre-tout li femo que soun parla en mens argoutique per recampa tout lou voucabulàri.
Pièi repren lou biais de parla emé li son (l'acent), li noum e lis ajeitiéu (lou genre), l'article e li prounoum, lou verbe, la fraso, li mot invariable, lou voucabulàri e s'acabo per un diciounàri d'aqueste parla.

L'autor:

Auguste Brun es nascu à Pau en 1881. Es un lenguisto que faguè d'estùdi d'istòri e d'alemand à Pau. Faguè uno licènci (1902) en Sorbonne, agrega de gramatico (1906), fugué nouma à Touloun (1906/1907), pièi en Avignoun (1907/1911) e à Digno (1911/1914) quand la guerro esclatè. Demoubilisa e proufessour au Grand lycèu de Marsiho, se meteguè à l'escrituro de si tèsi, soustengudo en 1923.
Ôucupe la cadiero de lengo roumano à la faculta de z-Ais, ensignant l'istòri de la lengo, la filoulougio e la literaturo franceso subre-tout di siècle XVIenc e XIXen. Perseguiguè soun enquisto sus La langue française en Provence de Louis XIV au Félibrige, (1927). S'interessè au lengage ourau dins Le Français de Marseille, un classique, e prepausè uno esplicacioun nouvello de la fragmentacioun entre lengo d'oc e d'oil (1928). Uno malautiè crudèlo meteguè uno fin à-n-aqueto quisto inalassablo. Es mort à Marsiho en 1961.