La partida clandestina - Le match clandestin - Frederic Vouland

La partida clandestina - Le match clandestin - Frédéric Vouland

L’autor provençal partís d’un fait que li contèron : una partida de XIII que ramosava joves aprèp l’interdiccion de Vichei, arrestada pels Alemands en cèrca de man-d’òbra pel STO, mas que daissan la pòrta opausada del vagon dobèrta… L’eròi s’escapa cap a Anglatèrra e rescontra l’Antonin del costat de Lesinhan. Los dos collègas se jogaràn de la polícia franquista per s’engatjar coma paracasudistas. De Provença e Lengadòc al nòrd d’Anglatèrra e Australia, l’istòria camina sus las tèrras del rugbí de XIII.

Aquò permet a nòstre eròi de nos explicar l’istòria, la sociologia, lo teatre, los trobadors, Mistral, la premsa… vistes a travèrs del prisme del rugbí e del XIII en particulièr que, per son costat eretge, son fòrabandiment pels poders e los mediàs, coneis una situacion semblanta a la de la lenga e de la cultura d’Òc.

Lo libre es portat per la fòrça de la paraula d’un escriveire-contaire, la paraula element fòrt d’un espòrt de rescontres convivials, locals e internacionals a ne faire virar ovala la planeta.

IEO Aude - Vendémias.

L'autor:

Frederic VOULAND, nascut en 1955 en Provença Nauta, dins un mitan obrièr, felibrenc e comtadin, aprèp lo licèu a Dinha davalèt en Avinhon per far sas universitats. A costat d’una mestresa de Letras Modèrnas i trapèt la passion del teatre. Trabalhèt sièis ans amb A. Benedetto e lo teatre dels Carmes, mas tanben amb A. Gatti, coma actor, autor, meteire en scèna, musicaire, maquinista... Una passion qu’a trobat un terren de tria dins lo festenal d’Avinhon... Ara es vengut mèstre d’escòla dins Var. Escriu de novèlas dempuèi un vintenat d’annadas. Pel primièr còp son recampadas en un recuèlh que deuriá far descobrir un autor fòrça original.