Dins las carrièiras dau Clapàs - Edouard Marsal, Pascal Wagner

Dins las carrièiras dau Clapàs - Edouard Marsal, Pascal Wagner

50 reproduccions de gravaduras de Edouard Marsal e 50 fotografias de Pascal Wagner.

Un libre que nos fa descobrir lo Montpelhièr dau sègle XIX  que la lenga de cada jorn per carrièra n'èra la lenga d'oc, a travèrs l'agach benvolent e tot còp risolièr d'Edouard Marsal. Son 50 retraches pintoresques en mots e en imatges dau pichòt pòble montpelhierenc, aquí recampats.


Edouard Marsal (Montpelhièr, 1845-1929) es conegut coma pintre e illustrator, mas tanben coma felibre, aparaire convençut de la lenga d'òc. Son obratge Dins las carrièiras dau Clapàs, publicat en 1896, recampa cinquanta retraches en mots e en images del pichòt pòble montpelhierenc : mercands e mercandas de carrièira (de vin, de vinagre, d'ensalada fèra, de cagarauletas, de lach de sauma, cabra o vaca, de merçariá, de tripas, de jornals, de benhets, de bonbons.), amolaire, escuraira, cardaire, brutlaire de vin, descrotaire de sabatas, mas tanben marginals a l'encòp comics e tragics (nècis, colcavestits, ibronhas). Un Montpelhièr popular e avalit, lo Clapàs d'un còp èra, s'anima jos nòstres uèlhs de totes aqueles ganha-pichòt, d'aqueles gents de pauc que son l'anma de la vila e que Marsal fa parlar, amb totas lors cridas de mestièr, dins la sola lenga que coneisson : l'occitan.

Mercés a Pascal Wagner, bibliotecari montpelhierenc, lo libre dins las carrièiras dau Clapàs , es a l'encòp de bon legir e modernizat, transcrich dins la grafia classica amb una traduccion en francés acompanhada de nòtas e de fotografias dau Clapàs de uòi dins los luòcs ont Marsal dessenhèt sas gravaduras.

A caduna de las 50 gravaduras respond una fòto actuala del site ont figura lo personatge, presa exactament dins la perspectiva del dessenh e permetent aital de mesurar la permanéncia e las mudasons de Montpelhièr.

Enfin, una mapa dau còr de vila ont son marcats los sites que Marsal causiguèt per realizar sos retraches, convida lo mond a visitar la vila d'un autre biais dins las piadas de l'artista per descobrir aquel temps desaparegut. Un guida plen d'umor e de tendresa per aquelas vidas minusculas que reviscòla dins aquelas paginas.

Òbra artistica e literària en meteis temps que document irremplaçable, reedicion del libre de 1896.

Transcripcion en grafia classica, revirada francesa e fotografias d'ara dels luòcs de las gravaduras, de Pascal Wagner.

Edicions Jorn.

Publicat amb l'ajuda de la Region Occitania e de la metropòli de Montpelhièr-Mediterranèa.