Ont'a passat ma planeta ? - Florian Vernet

Ont'a passat ma planeta ?  Florian Vernet

Cats es estat mandat en mission per veire cossí los umans capitan de viure sus Tèrra, mentre que las condicions son pas tant bonas, çò sembla, que sus Xac, sa  planeta sieuna.  Vengut d'una civilisacion mai avançada, s'en tira pas mal, e mai se li cal descobrir un fum de causas de totas menas...
Mai acaba per se retrobar dins una veitura menada per Mariana (tòp modèl), en companhiá de Glaudi Barsòtti, entre Geneva e Marselha, la Mafià a los persègre...

Quand venètz de la planeta XAC sus tèrra per sauvar vòstra planeta, e qu'avètz de poders subrenaturaus, tot va ben. Mai de qu'a ben poscut arribar per que nòstre extra-terrèstre se retròbe entre Geneva e Marselha, en companha de Glaudi Barsòtti, dins una veitura menada per Mariana, una tòp-modèle, ambé la Mafià a l'après ?

La reedicion d'un roman publicat en fuelheton dins lo jornal La Marseillaise en 1995. De (tornar) legir, aquel roman cortet e plen d'umor que vos farà sortir de la morositat ambienta, plan segur !

IEO edicions, colleccion Crimis.

L'autor:

Florian Vernet (Besièrs, 19 d'abril de 1941) es un lingüista, pedagòg e escrivan occitan. Foguèt professor d'occitan a l'Universitat Pau Valèri de Montpelhièr abans de prendre la retirada en 2006. Es tanben un dels membres de l'Acadèmia Occitana-Consistòri del Gai Saber e a l'encòp del conselh lingüistic del Congrès Permanent de la Lenga Occitana.

Extrach :
[Primièra nuèch sus Tèrra] "Lei Terrians son de gents vertadierament curiós, imprevisibles, comunicatius e talament diferents leis uns deis autreis. Imaginatz-vos que, dins l'oreta que vèni de passar defòra, siáu estat abordat au mens quaranta fes ! E rèn que dins lo quartier pròchi de l'Operà ! Un que me voliá vendre un produch de qualitat superiora que n'ai pas comprés lo nom mai que permet – çò disiá – de se mandar en l'aire en dos temps tres moviments e per pas car. Un autre que me voliá convidar a un espectacle requist dins un cafocho que li donavan un Peep-Show (segon çò qu'ai comprés, s'agiriá d'una mena d'espectacle-conferéncia etnologic, mai aviáu pas aquò en testa)..."

« Per sobra de maganha, l’i a un messatge sus mon ordinator. Lei « responsables » de la Mission (aquelei putas auràn trobat lo remèdi, sensa me dire ren), an decidit que dins lei tres jorns que venon deurai tornar sus ma fusada ! Ajustan que devi pas mancar lo Module que me vendrà quèrre se vòli pas demorar ad vitam æternam faidit sus Terra. D’èstre un emigrat, es pas aquò que me lanha, mai la marrida maniera. »