Jamei aiga non cor capsús - Benoît Larradet

Jamei aiga non cor capsús - Benoît Larradet

Aqueth pau granàs i seré enqüéra, quilhat aquiu en la grava de la plaja com un senhau shens nada significacion vededera ? Que s'ac demanda adara en possant drin la cavala au tròt Ihevat, mes que pensa que quiò, com se i èra tostemps estat e com se i devèva demorar a jamei.

Lo bearnés José Lostalet, vadut gaucho dens la pampa argentina, ne sabarà pas jamei qu’un tròç de husta ei arribat a Punta Blanca. Quin poderé imaginar que son gessits de la medisha tèrra, eth e lo pau ? Annadas en darrèr, l’indian Talcaolpen qu’èra estat lo sol òmi qui avèva podut audir lo planh de l’avet. Ua epòca trespassada qui a engolit las dolors de l’un e de l’aute.

Jamei aiga non cor capsús, un roman de Benoit Larradet d’escritura rica e sensibla sus l’anar deus òmis e autas destinadas au briu de las aigas.

Roman en occitan gascon, prefaci de Joan-Luc Landi.
Colleccion Incognita n°10, edicions Reclams.

L'autor:
Benoît Larradet que vado en 1954, a Friburg im Brisgau, en Alemanha. De pairs bearnés, que va tornar lèu sus las tèrras deus ajòus entà demorà'i definitivament. Educator puish ensenhaire en occitan, a Calandreta, que va consacrar bona part de la soa energia a har vàler la cultura occitana, màgerment per la musica e l'escritura.


Estraches:
« Mes qui ètz, vos qui parlatz atau dab aquera votz qui n’ei pas d’ací ? »
« Qu’entenes la lenga mea, òmi roi !
– De qui ei la votz qui’m parla ? E seré la mea pròpia ? Ei la d’un mort o la d’un viu ? N’ei pas aisit de har la part de l’un o de l’aute per aquera escurida. »

---

Ath cap d’annadas shens nada letra, er’atenta que’m semblava mei dolorosa enqüèra qu’era manca de novèlas. A’m demandar cada dia si eths de casa e m’anavan respóner, que tornavi avitar eth mau escosent qui m’arroganhava.
E totun, tant qui’m demorava un espèr d’arrecéber era letra esperada, per tan petit qui estosse, non me podèvi pas empachar d’aténer e d’entretiéner atau eth men in·hèrn.


Article de premsa:

L’ostal d’edicion Reclams presenta lo primièr roman de l’escrivan bearnés Benoît Larradet. Entitolada Jamei aiga non cor capsús, l’òbra sembla un conte e conten tres istòrias crosadas. I a l’istòria d'un tronc d'arbre dels Pirenèus, vengut mast d'un batèl negrièr que, pendent una tempèsta als apròchis d'Argentina, se romp e s’esclapa. Aquí, a la broa del Río de la Plata, va discutir amb un indian, Talcaolpen, darrièr descendent de sa tribu. Los dos protagonistas se van contar lors epòcas passadas, lors beutats e lors dolors. Pus tard, lo bearnés José Lostalet, vengut gaucho dins la Pampa, ven suls luòcs mas sauprà pas jamai cossí aquel tronc es arribat en aquel endrech.
Nascut en 1954, Benoît Larradet es mai que mai conegut coma jogaire d'acordeon diatonic dins lo grop Brigada Menestrèrs. Es tanben secretari de l'associacion Bearn Argentina, un país que coneis plan ben gràcias a sa familha e a son interès personal.

Article dau Jornalet, lo 21 de novembre de 2021.


Presentacion deu libe a Radio Pais: