Novel almanac setòri e de las ribas de Taur 2022

Novel almanac setòri e de las ribas de Taur 2022

Lo Cèucle occitan setòri ven de reviscolar l’« Almanac Setòri e de las ribas de Taur », una revista istorica, estampada pel primièr còp a la fin dau sègle XIX.

« Avèm gardat la devisa de la revista qu’es de parlar de Seta as Setòris, mas aquela devisa l’avèm alargada, puòique balham tanben la paraula as neo-Setòris e au mond de’n defòra. » A l’encòp un raconte de la vida vidanta e un guida per descobrir la vila, l’Almanac beneficièt d’una bèla edicion. « Au mens pòt far polit dins una biblioteca », ditz Miquèla Stenta (militanta, escrivana e Setòria).

Ceucle occitan setòri.

Amb Rodín à la maquette, au montage et conception graphique.

Amb Hélène Morsly, Serge Boyer, Alain Charrié, Héloïse Buonomo, Philippe Carcassés, Maude Buinoud, Jean-michel Lhubac, Marie José Lhubac, Lenga Viva, Guillaume Saisset, Laura Seguin, Carmen Di Rosa, Cyrielle Garrigues, Louis D'isernia, Richard Di Rosa, Los del Patrimòni, Jean Brunelin, Calandreta Dalfinets, IZa Superbelle, Voilelatine Debouzigues, Cap Brassens
et bien d'autres...

Article de premsa:

Çò qu’aviá desaparegut pòt renàisser. E qual reviscòl ! L’Armanac cetòri èra un monument de la literatura populara de la vila maritima, escanat per la guèrra de 14. Mai de cent ans aprèp tòrna, a las colors de 2022, engimbrat pel Ceucle occitan setòri. Cal pas tròp comptar i crosar los Sants, nimai i trobar lo calendièr de las fèstas, e rai de tot aquò. Tornam a un essencial fornit e rensenhat, amb la volontat fèra de daissar la plaça a la paraula liura e a la cultura viva, qu’aquò siá en francés, en occitan, o dins un saborós barrejadís. En aquò es plan un almanac, passam d’una lenga a l’autra, d’una pluma a l’autra, d’un registre a l’autre, sauticam naturalament de l’Istòria a la musica, la literatura, las arts, los espòrts tradicionals ; la cultura populara, la sapiéncia del monde, es pertot presenta, las voses se ligan e se desligan, esboçant dins un retrach polifonic una vila d’influéncias mescladas e del còr bategant. La fòga dels convidats es comunicativa, e dona enveja de descobrir Seta lo libret jol braç coma s’èra un guida toristic, sabent sens èsser sabentàs ! Causida sensibla pels tempses que vivèm, aquel almanac celèbra l’acuèlh de totes e totas los e las que bastiguèron e abitèron la ciutat, de personatges colorats que, sovent, venián de luènh. Aprèp d’elements de fonologia « tradicionals » dins un tal obratge, çò consacrat als Italians venguts de Calàbria amb lor(s) dialècte(s) fa lèu compréner que tenèm aquí un obratge rare, e polit amai (la maqueta es de l’artista Rodín Kaufmann, la cobèrta d’Alain Delmas). E encara, tot i cabiá pas çò ditz Miquèla Stenta, presidenta del Ceucle Setòri. Lèu un almanac per 2023 ? Res sembla pas impossible, amb una ciutat d’una cultura tan rica nos disèm que se pòt cavar pus pregond encara per far sortir tota la saba e la sabor !
Lo Diari.