L’afaire dau porquet - Reinat Toscano

L’afaire dau porquet - Reinat Toscano

"Dins aqueste rouman venènt d’aprendre qu’uno annado un evenimen imprevist l’a meso en peril. Aquelo empego !
Retrouban lou journalisto loucau, Milo Levesque que vai assaja de resòudre l’afaire : touto la pourcaio di car-saladié, vengu pèr lou marcat de la dimenchado, es estado raubado dins la niue !
Plus ges de saussisso, de boudin, d’andouieto, de saussissot, de cambajoun, de pourqueta....
Queto panico au moumen de l’inaguracioun de la Fiero. La fau-ti anula ?
Noun, fuguè duberto emé de nougat, d’òli, de bescue, de flour... Nouvello panico demié li groumandas afama, vengu pèr se coungousta pèr aqueto fèsto tant óuriginalo.
Lis ourganisaire sounèron la pouliço municipalo e li gendarmo de Brignolo.
Mai li maufatan an tambèn sagata lou simbèu de la fèsto : Mèste Pourquet ! Sacrilège !

Sant Antòni, Sant Antòni,
Sant Antòni dau Porquet !
Dounas-nous l’estrambourd,
Sant Antòni , coquin de sort !

Lou maire e sis ajoun, vengu à la rescousso, assajon de calma soun mounde. Li gendarmo embarcon li renaire, que coume soun en Plan Vigi-pirate, podon pas faire mai.
Milo, qu’es un coulègo dóu Grand Mèstre de la Counfrairié dau Pourquet aceto vèn voulountié de se carga de desnousa l’afaire.
De soun biais trufarèu, Reinat Toscano nous meno dins lou vilajoun ( ounte rèsto ) tout delong d’aquéli dos journado que se passon subre-tout à manja de bono car-salado e de se coungousta de bon vin.
La coumpagnié es jouiouso, l’istòri es óuriginalo emé un pau de suspènso, e uno courso après li raubaire... e la pourcaio.
Vous pode pas racounta la fin ni lou perqué de l’afaire, mai l’istòri se legis eisadamen, e nous baio envejo d’ana passa uno journado au Vau, qu’es, entre autre, un vilage bèn prouvençau.
Reinat Toscano es un especialisto de pichots oubrage, poulicié o noun, courtet, que fan passa un bon moumen.
Esperan qu’es soulamen uno obro de fissioun e qu’aquest an, pèr la Fèsto, saren pas priva de car-salado e de rejouïssènço de bouco."

Article de Tricio Dupuy, dins Prouvenço d'aro n° 323 (07-2016).

Racònte en provençau/francés.

Edicions Auba novèla.

Estrach:

Quàuquei setmanas après mon retorn, coma cada an, per la promiera dimenchada de setembre, se tenié la Fièra de la Saussissa, famosa fèsta locala tradicionala. La fèsta màger de l’endrech. [1]

            La fèsta s’anonciava bèla, d’aitant mai que lo temps prometié d’èstre caud e ensolelhat. Tótei se fretàvon ja lei mans en prevision dei sòus que sarién entrats dins lei caissas.

            Mai au matin dau dissabte, patatràs! Lei beus pantais de capitada d’un còup s’esvaniguèron, quora leis expausants s’avisèron que li avién raubat tota la porcalha.

            Se pòu facilament imaginar lo pati qu’aquò metèt dins l’organisacion de la Fièra!

            Au moment d’aculhir lo public, pas un saussisson, pas una calheta, plus ges de porqueta, plus lo mendre trulle, ren! Ren de ren! Unicament çò qu’avié pas de rapòrt amé lo pòrc.

[1] Lei marrídei lengas díson «la soleta»…