Los gavians del Morre Blanc - Jaumet de Mèsa

Los gavians del Morre Blanc - Jaumet de Mèsa

Intrigat per la mòrt estranha dels gavians, Gèli s'assabenta al près de son pepin e decidís d'explorar los entorns amb son vesin pichon, Imran, un calandron d'un desenat d'annadas.

Gèli e Imran rencontraràn Auda, filha de vinhairon, que los rejonherà dins lors recèrcas : una vertadièra istòria d'amistat entre tres joves, entrainats dins una enquèsta ecologica que la solucion ne’n serà trobada gràcias a eles.

De gavians trobat mòrts, un rencontre còp d'azard al bòrd d'una sompa pudenta, una vertadièira istòria d'amistat de tres jovents enrebalats dins una enquèsta ecologica. Lo Jaumet perseguís son prètzfach de donar bona lectura als joines, lo libre Los gavians del Morre Blanc editat per lo Buòu de Mèsa es estat ofèrt a un centenat de collegians de la vila e a d'unes calandrons de la Cardonilha.

Recompense : Seleccion Prèmi literari Calandreta.

En occitan lengadocian, amb un lexic plan cort en occitan a la fin del libre.

Edicions Onorona - IEO Erau.

L'autor:

L’òme sortit de l’estanh : Jaumet Demèsa. Autor de libres en occitan per los enfants mas pas solament. Ie devèm Òme d’Òrb (IEO Erau, 2021) -premiat per los escolans de cicle III de calandreta; Bruèissa o Fadarèla (IEO Lengadòc, 2019), Los Crancs (IEO Lengadòc, 2016) ; Lo mistèri de Creissèls (La Poesia, Montpelhièr, 2012) ; L’òme sortit de la mar (IEO Lengadòc, reed.2010, 1999) ; Lo gojat que parla a las bèstias (IEO, 2003) ; Los raubaires de Taur (La Poesia, Montpelhièr, 2003) ; La salvatgina (Onorina, Mèsa – La Poesia, Montpelhièr, 2002).
Ancian president dau Cercle Occitan lo Buòu de Mèsa, sòci de l’IEO. Cantoral e responsable dels rescontres de la cançon occitana a Mèsa.

Estrach:

...Medòr, partit a la perseguida de qualques bestiòtas, demorèt mut, tant coma los gavians que se'n tornavan cap a l'estanh e qu'an pas res vist.
Gaitavan cap al Morre Blanc.

"– Imran, aqueste còp m'enganarai pas. Seguirem lo lièch de Nega-Vacas, e montarem cap a sa sorga. Nos calrà cargar de sabatas de plaja que de segur nos enfangarem.
"Sul trepador los dos dròlles meton al punt lor sortida per l’endeman matin. Gèli aguèt pas de besonh de degun per se despertar d'ora.
– Ont vas de tan grand matin ? Pòdes pas demorar un pauc mai al líèch ?
"Mamet Estela, dins sa cosina, fasiá pas de bruch per daissar dormir son felen e vaquí que Gèli la fa tressautar amb son 'Bonjorn Mamet !'
"– Amb Imran anam faire un torn a bicicleta."

(p. 23, debuta del capítol 4).