Petit manuel du toponymiste occitan - Joan RIGOSTA

Petit manuel du toponymiste occitan - Joan RIGOSTA

Un grand coneisseire de l’estudi dels noms de luòc (en occitan, mas Joan Rigosta es poliglòt e saberut) liura sas claus de trabalh, tan coma qualques unas de sas fruchas. Un pauc sul desespèr del constat que l’onomastica es una disciplina menada sens formacion reala, per cada cercaire dins son canton, e que pauc de libres ofrisson lo metòde d’enquèsta, quand bravament ne donan la resulta. Pedagòg, Joan Rigosta es abitat de la volontat de transmetre, pas sonque son saber, espandit, mas lo biais de l’aquesir. Un present salutari que poirà ajudar tot lo monde, qual que siá lo nivèl, a tornar trobar e valorizar las nombrosas traças de preséncia occitana sul territòri.

Nòstra cultura e nòstra identitat nos interèssan totes e, entre maites, l’estudi dels noms de luòcs e de personas. Pr’aquò existís pas brica de formacion – oficiala – per aqueste estudi : la màger part dels cercaires se son formats solets, amb l’ajuda de qualques libres, de còps de qualques conselhs, e de bravament d’experiéncia...
Aquò butèt Joan Rigosta a escriure aqueste Petit manuel, per totas e totes los que s’interèssan a l’estudi e a l’origina dels noms de luòcs dels païses de lenga occitana. Es un guida per evitar qualques errors e qualques trapèlas, una ajuda per ganhar temps e un conselhièr per lor remembrar que la prudéncia es indispensabla. L’autor l’a volgut pro simple, que dona pas que las coneissenças fondamentalas e sens teorias sabentas.
L’a concebut tanben en se recordar que, cada jorn, lo tresaur d’aqueles noms ancians, que parlan encara nòstra lenga, es a demesir e a se perdre. I a doncas de trabalh per totes e totas… e aquò prèissa !

Libre en francés, amb glossari e index alfabetic de las nocions emplegadas.
Edicions Novelum - IEO Perigòrd.

L'autor:

Joan Rigosta (en francés Jean Rigouste, Senalhac del Causse, 25 de novembre de 1938) es un pedagòg e lingüista occitan especializat en toponimia. Foguèt ensenhaire de letras als licèus d’Agen, de Merinhac e de Brageirac. Trabalhèt tanben a l’IUFM d’Aquitània e a l’Universitat de Bordèu III. Es l'autor dau libre Parli occitan e fondators de l’Escola Occitana d’Estieu.

L'obratge es devesit en doas parts:
1 - Domaines, sources, méthodes (mapas, archius, enquèstas de terrenh, bibliografia...)
2 - Eléments de toponymie (istòria dels noms de luòcs e "éléments de première nécessité").
Es ponctuat per d'enigmas toponimicas amusantas que vos permetràn de metre en òbra las coneissenças totas nòvas.