Henerècla - Alidé Sans, Paulin Cortial

Henerècla - Alidé Sans, Paulin Cortial (CD)

Alidé Sans e Paulin Cortial: Viatge pòp a còr ubèrt.

Trabalh discografic dera man d'Alidé Sans e Paulin Courtial. Produsit a duo a partir de dues guitarres, acordeon diatonic e votz, mos pòrte musica mestissa (influéncies hip hop, reggae, bossa nova, ritmes africans...) damb un son "electro-artesanau", tot creant ua sinergia naturala entre dues lengües: musica e occitan (aranés).

Hètaman.

Lo grope:
Alidé Sans : voix, guitare, accordéon diatonique
Paulin Courtial : guitare, percussions

Enregistrat ena Val de Louron per Johann Berger (I/O Records).
Mesclat en La Chomette per Mathias Chaumet (MC Studio).
Masterizat per Yves Roussel.

Titols:

1. Aigua infinita     3:59
2. Eth riu     4:33
3. Bona umor     3:51
4. Es flors deth nòste prat     4:32
5. Era revolucion de Conchita     4:21
6. As vist?     3:28
7. Vèspe d’òli d’oliva     5:09
8. Sense votz     5:08
9. Adiu! Adiu!     2:02

Estrach:  ERA REVOLUCION DE CONCHITA

Cansada e aborrida dera sua vida,
d’èster net e dia trabalhant prauba Conchita.
En cambi aurie d’èster fòrça arregraïda,
escampes, draps, farrats, èren molt bona companhia.
Les ac auie regalat eth sòn atent marit
- Perque t’estimi tant! - Aquerò li auie dit.

Se’n va de casa, a besonh d’aire fresc,
decidís dèishar de patir en silenci tà tostemp.
Oh! quina suspresa! Ve que non ei soleta,
que n’i a mès d’ua qu’a agarrat era maleta!
-Ara entre totes mos cau trobar era solucion,
mos cau crear un milhor mon!

Ai! Paciéncia, lèu auram in...

E damb eth pas deth temps es hemnes ath poder,
inexplicablement majoritat en Parlament.
-Oh! Quina bestiesa tant pòga sabiesa!
Ja se sap qu’eres de política ne idea.
Coma boni protectors, e damb aires seductors
tà acabar damb tot açò vos aufrim aspiradors.

Ai! Paciéncia, lèu auram in...

Damb tota castetat e leiaus ath sòn mandat
un referèndum hèn, eth pòble a d’èster escotat.
Es auti ara activen un plan infalible,
decrèten enviar 155 gorilles.

- Ja sabem qu’ei molt riscós, mès er òme ei coratjós,
era patz restabliràn e es oles panaràn.

Ai! Paciéncia, lèu auram in...

Eth pas següent, perseguir eth moviment.
Metetz atencion, Conchita e totes en preson!

- Vos an abandonat, son de vacances.
- Enes plages de Madrid molt ben descansen.

Dempús de repression, tòque reconciliacion
naues eleccions, ara òc? damb dus collons!

- Votatz-mos a nosati, èm garantia.
- Vos domesticaram damb alegria!

E contra tota prevision, non i a cap modificacion,
es nòstes protagonistes se presenten enes listes
e tornen incrediblement a èster majoritat en Parlament.

Ai! Paciéncia, lèu auram independéncia!

Articles de premsa:

“Torni a caminar un viatge mes…”, las permèras paraulas deu disc aqueste. E quin viatge ! Tres ans après la sortida deu son permèr album Eth paradís ei en tu e ua pièla de concèrts per Occitània, Catalonha, País Valencian e la quita vila de New York, la musicaira aranesa Alidé Sans que torna dab Henerècla. L’opús qu’inaugura la creacion deu label Hètaman, en tot enregistrar (enfin) la soa collaboracion dab lo musicaire avaironés Paulin Cortial. Lo viatge pòp qui s’obreish per la breca aquesta, que potza en l’energia de l’empont, generosa e a còr ubèrt.

Cantaira, multi-instrumentista, autora, compositora, juntada preu Paulin Cortial guitarrista e fina aurelha adobaira, l’Alidé Sans qu’alinda lo son cant encarnat e cargat d’emocions, tostemps prestit de ròck, soul e reggae. Preus nau tròç aquestes, que tornam trobar las soas inspiracions gessidas deu paisatge e de l’amna pirenencs, qui an hèit créisher lo son espiar esmiraglat e revoltat. Qu’i bota deu son monde, deu son país, e que’s hèn enténer. L’occitan de la vath d’Aran qu’ei la soa lenga de tot dia, de l’intima, de l’amistat, de la revolucion. Que ns’ac liura en ua pòp doça aus ritmes plan sentits. Lo son produsit qui sap botar en valor la soa expressivitat. Totun que daisha quauquas finèstras epuradas, tau com la cançon Sense votz enregistrada en ua presa sus bandas analogicas, on tornam au duò vutz e guitarra. Per la cançon Eth Riu botada en davant per un permèr vidèoclip disponibla sus la tela, que reconeishem aqueras inspiracions de natura, la de l’arriu qui’s passeja tau com la vita e s’encamina dab hidança. Qu’èm gahats peu groove solide de Bona umor e de Vèspe d’òli d’oliva, on ací particularament, la votz cauta de l’Alidé revela un tèxte qui celèbra la sabor e la poesia deu moment present. Era revolucion de Conchita qu’ei lo conte faceciós deu disc, on ua hembla avia la conquista deus aròus deus capulats politics. Entiò l’independéncia ? Shens transicion, l’intimista As vist ? qu’avoa ua fragilitat suu ton de la confidéncia amorosa, e desplega un dialògue enter vutz vulnerabla e vriulons esmavents. Ua interprèta vertadèra, que v’ac disi.

Enregistrat au mes de genèr de 2018 a Germ per Johann Berger (I/O Records), Henerècla qu’ei portat peu label Hètaman, un nom qui soa artisanau e independent. Com ac comenta l’Alidé Sans : « Creiguem fòrtament en empoderament der’artista respècte dera sua òbra. De moment eth nòste disc ei eth prumèr trabalh discografic de Hètaman, mès era idea ei poder produsir d’auti artistes en un futur trabalhs discografics d’auti artistes. »

Article de Caroline Dufau, lo 21 de mai de 2018, Lo Diari.

---

Es sortit lo darrièr album d’Alidé Sans amb Paulin Courtial entitolat « Henerècla ».
La cantadoira aranesa, acompanhada del musician roergàs, definís lo trabalh coma « ua alenada d’aire fresc que baishe des montanhes » e precisa que dins lo trabalh « i a ua fòrta preséncia dera natura qu’ac pintre tot damb es sues colors ».
Aigua, natura, riu, femna... serián los mots clau per definir aqueste darrièr trabalh ont trobam de cançons engatjadas per l’environament, per la natura. Mas lo feminisme e la situacion politica que la vivon Catalonha e Aran son fòrça presents tanben dins las paraulas de sas cançons. « Henerècla qu’ei un album de 9 cançons, fòrça diferentes entre eres.
Podem díder qu’ei un album fòrça eclectic. Damb aguest trabalh auem volut aprigondir ena formula duo, e de hèt totes es cançons son interpretades en duo entre Paulin Courtial e jo », çò disiá Alidé al jornalista Manèl Zabala a l’ocasion del concèrt de presentacion a Barcelona lo 6 d’abril passat. « Çò qu’auem trobat en aguest disc ei mès qu’un estil, pr’amor qu’eth nòste estil ei complicat de definirlo », çò remarcava la cantadoira en tot precisar que s’agís d’ « un estil de mestissatge deth Mond, entre reggae, hip-hop, bossanova, tanben i a es sòns un shinhau africani... totun mès qu’un estil pròpri poderíem díder qu’auem un son, un son que credem qu’ei fòrça fidèu ath nòste duo. Eth nòste duo son dues guitarres, ua votz, un acordeon diatonic. Tot ei hèt a partir d’açò, eth baish, es percussions, son hètes a compdar de dues guitarres ».
Trencar l’estereotipe que la musica occitana es tradicionala E mai se la musica tradicionala occitana « a agut ua importància ena formacion deth disc », aqueste album conten pas res de musica tradicionala.
« Nosati auem decidit de hèr musica de creacion », çò ditz Alidé del temps que planh que se catalògue dirèctaments la musica occitana coma musica tradicionala : « Pensi qu’ei ua limitacion e que calerie trincar aqueth estereotipe ».
« Un disc qu’o avèm fach tot »
Quant a el, Paulin Courtial, explicava amb fiertat l’autoproduccion del disc : « Sèm plan contents de nòstre resultat perque es un disc que nosautres o avèm tot fach : cercar lo finançament, produire, cercar l’estúdio.... Avèm cercat tot aquò, e tot aquò o avèm fach nosautres, e avèm creat quitament un labèl dins la Val d’Aran. Per tant, podèm pas èsser decebuts. Puèi, musicalament, i a de causas que poiràn agradar mai a d’unes qu’a d’autres, mas sèm plan contents d’aver fach tot aquel camin. Ne sabèm fòrça ara. Avèm comprés e avèm aprés fòrça amb tot aqueste trabalh. »
Alidé precisa :
« Aguest trabalh l’auem hèt tot en autoproduccion. Quan decidírem a hèr aguest trabalh auíem clar qu’ac
volíem decidir tot. Volíem decidir a on s’enregistrarie e com, quan gesserie publicat, qui aurie de hèr era distribucion, era comunicacion, eth dessenh... Totes es estapes deth procès de produccion deth disc les auem hètes nosati ».
Article de Ferriòl MACIP dins La Setmana.