Paraulas d'ausèls e d’autras bèstias - Maria-Odila Dumeaux (libre audio)

Paraulas d'ausèls e d’autras bèstias - Maria-Odila Dumeaux (Libre audio)

Los ausèls, los cal saber escotar per comprendre lor lengatge. Maria Odila Dumeaux vos balha aicí las claus per descobrir çò que dison los ausèls de l’òrt, del campèstre o del bòsc. Tot un monde meravilhós de bèstias e de causas que parlan, devisan e cantan en bona lenga d’òc dins d’istorietas, de mimologismes, de contes e de comptinas ligadas, escritas e legidas per M.-O. Dumeaux. I trobaretz lo rossinhòl, la peput, la besenga, lo reipetit, l’agaça, l’agla, lo cocut o l’auriòu… mas tanben l’ase, lo piòt, la cigala o lo carriòl…

E comprendretz plan milhor las lengas de las bèstias !

Tèxte occitan e traduccion francesa en PDF.

Edicions Letras d'òc.

L'autor:

Maria-Odila Dumeaux, contaira de Cuzorn en Agenés, es afogada de cultura orala occitana. Fa plan temps que prepausa al public contes, devinalhas e mimologismes en occitan o en francés pebrat d’occitan, en jogant amb las concordàncias e las diferéncias entre las doas lengas…
Legís per las edicions Letras d’òc – Camins  recuèlhs de contes d’Andrieu Lagarda (Contes de la calandreta, L’aucelon de las sèt colors, Tres palometas blancas, Tres aucèls de l’ombra, Tres castèls del diable) o de J.-F. Bladé (Los dus bessons), en enregistrament integral.
A ligat una garba de mimologismes, de comptinas e de viralengas, Paraulas d’ausèls e d’autras bèstias. Los ausèls de l’òrt, del campèstre e del bòsc i prenon la paraula, acompanhats d’autras bèstias del país, tant domèrgas coma salvatjas.

Escotatz un estrach audio aqui.