Totem-Sismic - Polifonic System (CD)

Totem-Sismic - Polifonic System (CD)

Enmenat per Ange B (Fabulous Trobadors), Manu Theron (Lo Còr de la Plana), Henri Maquet e Clément Gauthier, aquel quartet aliga batèstas musicalas e jòcs vocals, cant occitan e beat-box.

Desplegant una energia comunicativa e una potença expressiva que passan jamai la mesura, Polifonic System invita a bolegar, se distraire, e s'elevar. Totes quatre cantan, se servisson d'instruments rudimentaris e posan dins la cultura occitana -e dins plan d'autras- l'inspiracion que los anima, en i mesclant las influéncias que piquetèron lors percors musicals respectius. Mas un campion de França de beat boxing, un falbutaire intestellar, un embelinaire de cabretas e un batalaire polifonista fan pas forçadament (totjorn) un grop. Se botèron doncas d'acòrd sus un repertòri comun, tirat de vièlhs cants a dançar occitans, d'aqueles cants que los ancians entonavan rabiosament quora l'argent veniá a mancar per pagar la musica. A la votz, de còps accentuats de petejaments corporals e d'alenaments ritmats, aqueles cants desplegan sus un buf continú totes los vams, totas las embriaguesas que fan trantalhar l'assisténcia. Projetats dins aquestes aires familièrs o longanhs, los musicairs se respondon primièr pacientament, cadun prenent la mesura de sos partenaris, puèi subran, sens rason tangibla, començan a se butar, a se butassar, s'afrontan dins de batèstas e de jòcs vocals ont to es permés : los renècs, las armonias incongruas, las imitacions desleialas, e, plan segur, l'emplec d'instruments ont l'aire e la votz son sollicitats.

Del temps qu'Ange B declina a l'infinit totes los sons qu'un micrò e una boca pòdon produire en aquesta debuta de sègle 21, del mai percussiu al mai suau, Henri Maquet inventa un univèrs linde e joiós sus sas flabutas antediluvianas, rejonh per un Clément Gauthier tot en malícias cevenòlas e un Manu Theron del diable.

Amb un libret bèu.

Coordinacion artistica per Mànu Théron. Compagnie du Lamparo.
Label Buda Musique - Socadisc.

Lo grope:

    Ange B : human beatbox, cant

    Clément Gauthier : cant, Flaüta, cabretas

    Henri Maquet : cant, Flaüta, violon…

    Manu Théron : cant, bendir

Titols:

1. Vautres que siatz a maridar - 4:25
2. A de matin - 5:31
3. Rigodons un peu - 4:28
4. Ma'mi faguètz pas - 4:32
5. Polkamploa - 4:47
6. Quand ieu m'en vau - 5:48
7. Divertigem - 2:43
8. La pastora - 5:24
9. Ieu soi anat - 4:50
10. La filha d'un paure òme - 6:39
11. Matin s'ei lhevat - 6:29
12. Lo cat - 5:16

Estrachs:

Article de premsa:

Totèm Sismic, lo primièr disc de Polifonic System que prepausa una reïnterpretacion actuala, fresca, viva e modèrna dels balètis tradicionals occitans.
 
Lo disc arriba après cinc ans de trabalh de la magnifica còla compausada pel musicològ marselhés Manu Théron, lo beat-boxer Ange B, lo musician arlatenc Henri Maquet e lo cevenòl Clément Gauthier. Produch a Marselha per la companhiá del Lamparo, lo disc es publicat amb lo labèl Buda Musique. Lo disc es acompanhat d'un libret illustrat  que tanben conten las paraulas.
 
“Es un projècte bèu perque es de dança, un projècte de balèti inspirat dei danças tradicionalas mai amb l’electronica se pòt dançar çò que vòs”, çò nos contava Théron fa qualques meses a la redaccion de Jornalet. E mai precisava: “Èra pas lo projècte mai important de ges de nosautres, es un projècte un pauc periferic, e doncas avèm fach un dotzenau o un quinzenau de concèrts cada an e après cinc ans avèm decidit de faire un disc”.
 
Lo disc l’enregistrèron en 2007 mas esperavan que i auriá mai de mejans e l’an sortit tanlèu plan alestit. Conten totas las cançons que Polifonic System canta abitualament sus l’empont mas tanben de cançons nòvas. “Per sortir lo nòu disc farem una fèsta e una virada per tota Occitània, per faire escotar aquò ai gents”, çò precisava Théron.

Manu Therón qu’ei un musician e compositor plan coneishut que dirigís era companhia deth Lamparo en Marselha. Qu'a viatjat pertot en Euròpa coma musicològ, e que propòse un repertòri comun de Porto enquia Sicília damb eth sòn grop Chin Na Na Poun.

Article dins Lo Jornalet dau 23 de novembre de 2019.