Lo Prinselhon - Antoine de Saint-Exupéry (francoprovensal)

Lo Prinselhon - Antoine de Saint-Exupéry (version francoprovençale)

Avó li desin de l'Otour - Amb los dessenhs de l'autor.

La version en arpitan (francoprovençal) de “Le Petit Prince”, par Matteo Ghiotto, Matteo Rivoira et la Chambra d'Oc.

In patremouéno preshoù an favour de la diversità languisticca de l’umanità pandeunn loquin lhe sarèt prezantaie la vershon francoprovensala de “Lo Prinselhon” de Antoine de Saint-Exupéry.

Souanhò din lo doméno di guetseut languisticco de la Setà Metropolitan-na de Turin, “Lo prinselhon” ou l’eut ià tradouit de Matteo Ghiotto, refereunn di guetseut languisticco francoprovensal, avó la supervizhon santeficca de Matteo Rivoira de l’Università de Turin, coordinatour do prozhé “Istitushon an grilheù. Leingue Mare, Lèi 482/99: Nórme an sovegarda de le minouran-he languistique istorique” e responsablo de les ashon iliaie o Dishounéro anfourmatizhò e a le 100 parole clhaie do francoprovensal.

L’idéia de hlò vershon ieu, ovradzo nóvo pre l’ére francoprovensala piemonteiza, lhe veunt de Ines Cavalcanti de Chambra d’Oc e de Diego Corraine de la moueizhon editris sarda Papiros spesializhò din la publicashon de lêvro an leinga sarda e din le leingue minoritére europeintse.

I se trate d’ina greunta oportunità pre pouintà li lemeunn desù nóhre leingue locale e pre betà an paluta tòt se potensialitaie. Ét ina manêre pre sartsìe de sòrtre de l’intimismo, qu’ou l’èt delon acompanhò l’imazhinéro di parleunn, afin d’arvà a de momeunn d’arcunusan-he istitusionalo e a in seins de la leinga plu hot e mour. D’esperein qu’ou poulisse iéhre lo premìe d’ina londze serìe de lêvro an francoprovensal e qu’ou sisso ina vriiò hi qu’ou voudront lire-li, pashonase e aprocése a het inórmo patroumouéno.

Edicions Papiros - Chambra d'Òc.

De quèi qu’ou parle “Lo prinselhon”?

Din “Lo Prinselhon”, in piloto ou l'eut forhiò de deseindre din lo dezèr do Saharà pre in problémo a son andzin. Iquieù, totun, ou cunut in prinselhon qu'ou venèt d'in otro planéto. Lo conto ou trate in témo filozoficco, aseù avó de pleunn a la drola fahon de vê e avouità le tsóze qu'ou l'ont li greunn. Hi pleunn a le tsóze  «amporteinte» e o mondo di greunn ou pareseiso taspó pre còl din lo lêvro. Bè que, pre comme qu'ou l'eut screzù, ou l'eut considerà in ovradzo pre li moueinà, “Lo Prinselhon”  ou l'èt d'idéie profonde de la viò e da la nateura de l'omó. Tòt heunn ou merdzeit bieunn din la rancontra do prinselhon avó lo reinot, qu'ou lhe móhre lo veritablo seins de l'amitià e li fondameunn de la nateura de l'omó, developà din lo deut: «De vaiein bieunn rinque avó lo cór. L'esensialo ét anveziblo pre li oueulh». E ou sont delon d'otre santein-he do reinot qu'ou l'esplicco d'otri témo fondamentalo do lêvro: «Te te rein responsablo pre delon de heunn que t'a aprivazhò» e «Ét lo tein que t'a dediiò a ta róza que la reunt si amporteinta pre te».

Qui ét Antoine de Saint-Exupéry?

Antoine de Saint-Exupéry (Lion, 29 de zouin do 1900 – mar Tirreno, 31 de zulheut do 1944) ou l'eut cunusù din tòt lo mondo prequèi qu'ou l'eut ià l'otour de he lêvro, an fransé Le Petit Prince, publiiò an 1943 e tradouit an plu de douehènn e hinqueunta leingue.
Screveunn famoù pre d'otri ovradzo, Vólho de nouèt, Tèra di omó e L'aviatour, ou l'avèt ganhò de pri literéro pandeunn sa viò, an Fran-he e a l'etrandzìe.
Pandeunn la seconda guèra mondiala ou s'èt angajò din l'aeronoticca militéra franséza e, apré l'armestisho, din le “Forces aériennes françaises libres”, ansein avó li Alià.
Ou l'eut desedù an voleunn, a la fin de la guèra, pre man d'in piloto de la Luftwaffe alemanda, din la mar deveunn Marsèlhe, apré d'iéhre modà de la Córsa vers Lion.
Li 29 de zouin do 2000, an ocazhon di hènt'an de sa neisan-he, l'aeropòrt de Lion ou l'eut ià antitrà a loueù.